2013-11-24 16:54

პარტია „ქართული ოცნების“ ყრილობაზე სიტყვით გამოსვლისას მოქმედმა პრემიერმინისტრმა ყოფილს მადლობა ზუსტად ცხრაჯერ გადაუხადა.

ირაკლი ღარიბაშვილმა სიტყვის დასაწყისშივე აღნიშნა, რომ ბიძინა ივანიშვილს განსაკუთრებულ მადლობას უძღვნის და მისი დამსახურებები ჩამოთვალა ისე, რომ ყოველ პუნქტს მადლობა ცალ-ცალკე მიაყოლა:

"მივესალმები ყრილობის დელეგატებს და მოწვეულ სტუმრებს და განსაკუთრებული პატივისცემით მე მინდა მივესალმო ბიძინა ივანიშვილს და მადლობა გადავუხადო მას. მადლობა იმისათვის, რომ დღეს საქართველო თავისუფალია, მადლობა იმისთვის, რომ ჩვენ დავიბრუნეთ ჩვენი ქვეყანა, თქვენ დაგვიბრუნეთ ჩვენი სამშობლო, მადლობა იმისთვის, რომ განსხვავებული აზრისთვის აღარავის დევნიან, მადლობა სიცრუის, ძალადობის და უსამართლობის დამთავრებისთის, მადლობა იმისთვის, რომ ქუჩაში ჩვენს თანამოქალაქეებს აღარავინ კლავს, ციხეებში პატიმრებს აღარ აწამებენ. მადლობა წართმეული უფლებების დაბრუნებისთვის. მადლობა ღირსების დაბრუნებისთვის, მომავლის იმედისთის, საქართველოს გადარჩენისთვის, მადლობა ყველაფრისთვის"– განაცხადა ღარიბაშვილმა.

მისალმებისა და მადლობის გადახდის შემდეგ ირაკლი ღარიბაშვილი პარტიის ახალ პლატფორმაზე საუბარს სეუდგა. სავარაუდოდ, წესდების ამონარიდების სუფლიორზე კითხვისას ერთი უხერხულობა შეიქმნა, როცა სუფლიორი გაითიშა: ღარიბაშვილმა პლატფორმაზე საუბრის გაგრძელება ვეღარ შეძლო და უხერხული პაუზის განსამუხტავად წყალი დალია, ხოლო დამსწრე საზოგადოებამ მას ტაში დაუკრა.