მეოთხე დღეა, ისრაელი ღაზას სექტორზე საჰაერო იერიშს განაგრძობს; პალესტინელი შეიარაღებული მებრძოლები კი ისრაელის შუაგულში ცდილობენ სარაკეტო იერიშის მიტანას.
”როიტერის” თანახმად, ბოლო დღეებში განხორციელებულ იერიშს, სულ მცირე, 82 პალესტინელი ემსხვერპლა. ისრაელის განცხადებით, მათი მიზანი ღაზას სექტორიდან განხორციელებული სარაკეტო იერიშისათვის წინააღმდეგობის გაწევაა. ისრაელის ლიდერები უკვე სახმელეთო ძალების ჩართვაზეც აკეთებენ მინიშნებას-გამოძახებულია 20 000 რეზერვისტი.
ისრაელის პრემიერის ბენიამინ ნეთანიაჰუს განცხადებით, „ამ დროისათვის ბრძოლა ისე მიმდინარეობს, როგორც დაგეგმილი იყო, თუმცა მომავალში, შესაძლოა, სხვა ეტაპზე გადავიდეთ. ამ დროისათვის ჩვენ ”ჰამასსა” და სხვა ტერორისტულ ორგანიზაციებს დავარტყით და თუ ბრძოლა გაგრძელდა, იერიშებს რაოდენობასაც გავზრდით,”-აღნიშნა პრემიერმა.
”ჰამასის” წარმომადგენლის სამი აბუ ზუჰირის განცხადებით, ”ჩვენ ბოლომდე ომისათვის ვართ მზად.”
ამერიკის პრეზიდენტი ბარაკ ობამა ხუთშაბათს ნეთანიაჰუს ტელეფონით ესაუბრა. ობამას თქმით, ამერიკის სურვილია ცეცხლის შეწყვეტის შესახებ მოლაპარაკებებში დაეხმაროს მხარეებს. საფრანგეთის პრეზიდენტმა ფრანსუა ოლანდმა შეშფოთება გამოთქვა დაღუპულების გამო და დაზავებისკენ მოუწოდა ორივე მხარეს.
ამერიკის სახელმწიფო მდივნის ჯონ კერის წარმომადგენლის თქმით, „არავის სურს სახმელეთო ბრძოლები იხილოს.”
შეგახსენებთ, პალესტინასა და ისრაელს შორის ურთიერთობის გამწვავება ისრაელელი და პალესტინელი მოზარდების მკვლელობამ გამოიწვია.
