-
2014-07-10 11:38
„როიტერი” დიპლომატიურ წყაროზე დაყრდნობით წერს, რომ გაეროს ვეტერანი მაღალჩინოსანი, ერაყსა და ავღანეთში გაეროს სპეციალური წარმომადგენელი სტეფან დე მისტურა, შესაძლოა, ახლა სირიაში გაეროს სპეციალურ წარმომადგენლად დაინიშნოს.
დე მისტურა ამ თანამდებობაზე ლაკდარ ბრაჰიმს ჩაანაცვლებს. ოთხშაბათს, გაეროს გენერალურმა მდივანმა ბან კი მუნმა რეპორტიორებს განუცხადა, რომ აღნიშნულთან დაკავშირებით კონსულტაციები მიმდინარეობს და ახალი ელჩის ვინაობა მალე გახდება ცნობილი.
შეგახსენებთ, სირიაში სამოქალაქო ომის დაწყების შემდეგ ქვეყანაში გაეროსა და არაბული ლიგის პირველი წარმომადგენელი გაეროს ყოფილი გენერალური მდივანი კოფი ანანი იყო, რომელიც ბრაჰიმმა 2012 წელს ჩაანაცვლა. კოფი ანანი გაეროს უშიშროების საბჭოს ადანაშაულებდა, რომელმაც გაერთიანება ვერ შეძლო ქვეყანაში მიმდინარე კონფლიქტის დასასრულებლად. უშიშროების საბჭოში რუსეთი, ჩინეთთან ერთად, სირიის ხელისუფლების წინააღმდეგ მიმართულ ყველა რეზოლუციას ბლოკავს.
ქვეყანაში სამოქალაქო ომი 2011 წლის მარტში დაიწყო, რასაც გაეროს მონაცემებით 150 000-ზე მეტი ადამიანის სიცოცხლე ემსხვერპლა; სირიის ორ მილიონზე მეტი მოქალაქე კი ლტოვილად იქცა.