2014-06-18 13:04

მაშველები ბარისახოში 84 წლის მოხუცს ეძებენ. მამუკა არაბულს ოჯახის წევრები უკვე მესამე დღეა ვერ პოულობენ. ახლობლების თქმით, მამაკაცი მეზობელ სოფელ გველეთში წავიდა, საიდანაც შუადღის საათებში უკან ბარისახოში გამობრუნდა და მას შემდეგ ის არავის უნახავს.

მაშველებმა და ოჯახის წევრებმა მის კვალს ვერსად მიაგნეს. 

როგორც დუშეთის მუნიციპალიტეტის სამაშველო სამსახურის უფროსი ლადო ლალიაშვილი "რუსთავი 2"-თან საუბრისას აცხადებს, დაკარგული მოხუცის ძებნაში ჩართულია დუშეთის პოლიციის ქვედანაყოფი.

"განახლდება ძებნა, ადგილობრივი მოსახლეობაც გამოვა, ჩართულია დუშეთის პოლიციის ქვედანაყოფი. ბარისახოს მიმდებარე ტერიტორიაზე არის სოფელი გველეთი. იქიდან რომ გამოვიდა, შეხვდა მეზობლებს, დაემშვიდობა, მივდივარ ბარისახოშიო. აქ ტყე-ტყე და მინდორ-მინდორ ჩამოდის ბილიკები. აი ამ ბილიკზე დაეშვა. ამის შემდეგ იგი აღარავის უნახავს." - აცხადებს ლადო ლალიაშვილი.