2014-05-15 23:47

12 მაისს, დაახლოებით 23:00 სთ-ზე, ლისის ტბის დასახლებაში, ურთიერთშელაპარაკებისას, 1976 წელს დაბადებულ ელვარდ მ-ს და 1975 წელს დაბადებულ იოსებ ჭ-ს ცეცხლსასროლი იარაღით მრავლობითი სასიკვდილო ჭრილობა მიაყენა და შემთხვევის ადგილიდან მიიმალა. დაჭრილები მიყენებული მძიმე ჭრილობების შედეგად საავადმყოფოში გარდაიცვალნენ.

„აფხაზეთის ხმამ“ ამ ტრაგიკული და სისხლიანი გარჩევის ექსკლუზიური დეტალები ერთ-ერთი მოკლულის მეგობრისგან შეიტყო. როგორც ის ამბობს, მომხდარიდან მალევე დაკავებული ეჭვმიტანილი მკვლელობას აღიარებს, მაგრამ აცხადებს, რომ მას თავს დაესხნენ და აუცილებელი მოგერიების ფარგლებში მოქმედებდა.

ერთერთი დაღუპულის მეგობარი, რომელმაც ინკოგნიტოდ დარჩენა ისურვა, ამბობს, რომ სინამდვილეში, ეს ასე არ იყო:

„მოკლულების მეგობარს დაუწყია მაგ ტერიტორიაზე, ზემო ვეძისში მშენებლობა, ამ დაკავებულს კი წილი მოუთხოვია, სავარაუდოდ 5 ათასი დოლარი. დაურეკია იმ ტიპისთვის, ვინც მშენებლობას იწყებდა და დაუბარებია სალაპარაკოდ, ეს კიდევ მეგობრებთან ერთად ყოფილა იმან რომ დაურეკა.

ეს მეგობრები, ანუ აწ გარდაცვლილები, საერთოდ არაფერ შუაში არ იყვნენ, სანდრიკას უბრალოდ მანქანაში ეძინაო, ამ მკვლელმა რომ დაინახა რომ ბევრნი იყვნენ და თანაც უთხრეს მაგ ფულს არ მოგცემთო, დაუბარებია, წამომყევით ზევით და იქ გავარკვიოთ რა ფულსაც გთხოვთო, წაუყვანია იმ თავის ნაკვეთთან და იქ მთელი არსენალი ქონდა მომზადებულიო, მანქანიდან არც გადმოუშვა ესენი, ეგრევე ჩაცხრილაო, ორი იარაღით ისროდაო, მერე ჩვენება მიუცია ჩემ სახლთან დამესხნენ თავს და თავს ვიცავდიო...

ყველაზე საშინელება ისაა, რომ სროლაზე გაეღვიძა სანდროს და მანქანიდან რომ დააპირა გადასვლა, ეგრევე ჩაცხრილა, მანქანაც სულ დაცხრილულია...“, - ამბობს ერთერთი მოკლულის მეგობარი „აფხაზეთის ხმასთან“.