25 წლის ლაშა მახარაძის მკვლელობის ირგვლივ არაერთი ვერსია სახელდება.
რა ჩვენება მისცა გამოძიებას მომხდართან დაკავშირებით დაკავებულმა ბერძენიშვილმა, რომლის „მერსედესიდანაც“ ესროლა მახარაძეს ოქრიაშვილმა, ჯერჯერობით უცნობია.
გარდაცვლილის თანაკლასელმა Ambebi.ge-ს მოუთხრო, რომ 25 წლის ახალგაზრდის სიცოცხლე „ოქრიკასთან“ მისი ძმის ადრინდელ დაპირისპირებას შეეწირა.
„ოქრიკა“ სასჯელს ლევან თალაკვაძის მკვლელობის გამო იმ პერიოდში იხდიდა, როდესაც ლაშა მახარაძის ძმა მარიხუანას მოხმარების გამო იჯდა ციხეში.
ცნობილია, რომ "ოქრიკას" ჯანმრთელობის პრობლემები ჰქონდა და ხშირად გადაჰყავდათ ე.წ. "რეზბალნიცაზე".
ის ციხეში ცდილობდა ე.წ. მაყურებლის სტატუსი მოეპოვებინა, რის გამოც ხშირად ექმნებოდა კონფლიქტი პატიმრებთან.
გარდაცვლილი ლაშა მახარაძის კლასელი ამბობს, რომ "ოქრიკას" და ლაშა მახარაძის ძმას შორის კონფლიქტი სწორედ ციხეში დაიწყო.
მისი თქმით, ლაშა მახარაძის ძმამ "ოქრიკა" ციხეში სცემა და სწორედ ეს გახდა მომავალი სისხლიანი შურისძიების მიზეზი.