"გურიანიუსის" ცნობით, გუშინ, ლანჩუთის მუნიციპალიტეტის სოფელ ჭანჭათში კეთილმოწყობის სამსახურის უფროსი, ნუგზარ ცინცაძე (ცანცუა) დაჭრეს.
როგორც მისმა მეუღლემ, იამზე ჩხაიძემ "გურია ნიუსთან" საუბრისას განაცხადა, ცინცაძე იური ვაზაგაშილის დაკრძალვიდან ახალი დაბრუნებული იყო:
- დაკრძალვიდან მეგობართან მივიდა. როგორც ვიცი, სუფრიდან ახალი ადმგარი იყო და ფანჯარასთან იდგა. სწორედ ამ დროს მოხდა გარედან გასროლა, -აცხადებს მეუღლე. მისივე ინფორმაციით, ცინცაძეს რამდენიმე ტყვია აქვს მოხვედრილი და მისი მდგომარეობა საკმაოდ მძიმეა. ჩხაიძის თქმით, იმ ოჯახში, სადაც ცინცაძე სტუმრად იმყოფებოდა, ორი ძაღლია მოწამლული. მომხდარზე უკვე დაწყებული გამოძიება.
"რუსთავი-2"-ის ცნობით კი, ქუთაისის რკინიგზის საავადმყოფოში მოთავსებულ ცინცაძეს ოპერაციას ვერ უკეთებენ, რადგან ერთი ტყვია მას ფილტვში აქვს მოხვედრილი.
ამჟამად, პაციენტს განმეორებითი გამოკვლევისთვის ამზადებენ.
ამავე წყაროს ცნობით, ნუგზარ ცინცაძე ყოფილი გამგებლის ოჯახში ფანჯარასთან იდგა, როდესაც მას ეზოდან ცეცხლი გაუხსნეს. სამართალდამცავთა განცხადებით, ეჭვმიტანილთა ვინაობა დადგენილია და მიმდინარეობს საგამოძიებო-ოპერატიული მოქმედებები მათ დასაკავებლად.
ნუგზარ ცინცაძეს სამი ტყვია აქვს მოხვედრილი - ფილტვში, მკლავსა და შუბლში.
