2014-06-16 09:33

ცესკოს ბოლო მონაცემების მიხედვით, რომელიც ცესკოს თავმჯდომარემ თამარ ჟვანიამ გამოაცხადა, საქართველოს რვა თვითმმართველ ქალაქში აღცევნების პირველმა ტურმა გამარჯვებული ვერ გამოავლინა.

არჩევნების მეორე ტური მოსალოდნელია ასევე თვითმმართველი თემების ნაწილში, სადაც ასევე, პირველი ტურის შედეგად ვერ გამოვლინდნენ გამარჯვებულები.

ცესკოს წინასწარი მონაცემების მიხედვით, რომელიც საქართველოს მასშტაბით მიღებული 5.400-ზე მეტი ოქმის მონაცემებს ეფუძნება, არჩევნების მეორე ტური ჩატარდება თბილისში, რუსთავში, მცხეთაში, გორში, თელავში, ოზურგეთში, ბათუმსა და ფოთში. ამ დრომდე კითხვის ნიშნის ქვეშ დგას ქუთაისი, სადაც საბოლოო მონაცემების შეჯერებას ელოდებიან.

თამარ ჟვანიას განცხადებით, მეორე ტური მოსალოდნელია ასევე თვითმმართველი თემების ნაწილში. ასეთი თემები გორის, თელავის, ახმეტის, ყვარლის, თიანეთის, მარტვილის, ქობულეთის, ბაღდათის, ხონის, ტყიბულის, ლანჩხუთის, თერჯოლის საარჩევნო ოლქებშია.