2014-11-27 05:26

ახალციხის მეხუთე საბავშვო ბაღის მენეჯერი ნინო ბაღდოშვილი ამბობს, რომ ბაღში შეტანილ პურში თაგვის ცურცლი აღმოაჩინეს. მენეჯერი მერიისგან რეაგირებას ითხოვს. - ინფორმაციას "სამხრეთის კარიბჭე" ავრცელებს.

ეს ფაქტი ახალციხის მერიისთვის და სკოლამდელი აღზრდის დაწესებულებათა გაერთიანების ხელმძღვანელისთვის ცნობილი დღეს გახდა. შეხვედრაზე 2015 წლის ადგილობრივი ბიუჯეტის პროექტს განიხილავდნენ, რომელსაც ბაღის მენეჯერები და შშმ პირები ესწრებოდნენ.

ახალციხის მეხუთე საბავშვო ბაღის მენეჯერმა ნინო ბაღდოშვილმა სურსათის ხარისხზე ისაუბრა და აღნიშნა, რომ მისი ბაღი საჭმელად უვარგისი პურით მოამარაგეს. ნინო ბაღდოშვილმა შეხვედრაზე პურის ნაჭერიც მიიტანა, სადაც მისივე თქმით, თაგვის ცურცლი აღმოაჩინეს.

ბაღდოშვილმა „სამხრეთის კარიბჭესთან“ კომენტარის გაკეთებისგან თავი შეიკავა. ააიპ ახალციხის სკოლამდელი აღზრდის დაწესებულებათა გაერთიანების დირექტორმა ნანა ბერიძემ კი განაცხადა, რომ აქამდე მსგავსი შემთხვევა არ ყოფილა და ამ ფაქტს შესაბამისი რეაგირება აუცილებლად მოჰყვება.