„ერთიანი ნაციონალური მოძრაობის“ წევრი, ნუგზარ წიკლაური „თავისუფალ დემოკრატებთან“ დაკავშირებით სოციალურ ქსელში წერს:
„ვიშ, რა პრინციპული, მედგარი და ხმალამოღებული ოპოზიცია გამოჩნდა?
იმდენად მედგარი, რომ გუშინ ოლიგარქმა მიიწვია სოლოლაკში, დღეს პარლამენტის თავმჯდომარე და სხვა მეოცნებენი ეწვივნენ ყრილობაზე, წარმატება უსურვეს, საპარლამენტო თანამდებობების შენარჩუნებას და უზრუნველ ცხოვრებას დაპირდნენ.
ეს ახალი სიმართლის მაძიებელნიც როგორ მორცხვად, მადლიერებით შეეგებნენ ბიძინას წყალობას: კარგიო, დავრჩებით პოსტებზეო, მანქანებსაც დავიტოვებთო, პრივილეგიებიც, ჯანდაბას, გვქონდესო.
გასაყოფი რა გვაქვს, ნაციონალები ხომ არ ვართო...
მგონი ყველაფერი ნათელია. ივანიშვილის საქართველოში ნამდვილი ოპოზიციის გზა პროკურატურაზე, ციხეზე, დევნაზე გადის და არა პრივილეგიებზე და თანამდებობრივ პატივზე.
ალასანიას პარტია ორი წლის განმავლობაში ამართლებდა ჩვენი ქვეყნის რეგრესს, ოპოზიციონერთა ციხეებში ჩაყრას, კოლეგებზე თავდასხმებს; ურცხვად ტყუოდა ჩვენი მინისტრების კორუმპირებულობაზე და არ ერიდებოდა ბავშვის სიკვდილით სპეკულაციასაც კი.
სიმართლე ეს არის და სიმართლე აუცილებლად და ყოველთვის უნდა ითქვას, თუნდაც ვინმე არ დამეთანხმოს, რადგან ლეღვის ფოთლების მეტამორფოზის არასოდეს მჯეროდა“, - წერს ნუგზარ წიკლაური.
