2014-10-29 00:40

დიმიტრი შაშკინმა, რომელიც თბილისში მანქანის ავზის საწვავით ავსებისთვის უფრო მეტს იხდის (20 აშშ დოლარით), ვიდრე ვაშინგტონში, ექსპერიმენტი ცაატარა და შედეგები "ფეისბუქზე" აღწერა.

"დღეს დავამთავრე საინტერესო ექსპერიმენტი - თბილისში იგივე მანქანით დავდივარ, რითაც ამერიკაში დავდიოდი და სამწუხაროდ, მივეჩვიე თბილისში ავზის ავსებისთვის 20 დოლარით მეტის გადახდას, ვიდრე ვაშინგტონში ვიხდიდი, მაგრამ, ამავდროულად, უფრო ნაკლებს გავდივარ.

ამერიკის დედაქალაქში ისეთივე საცობებია და არც თუ დიდად განსხვავებული კლიმატური პირობები, რაც ჩვენთანაა, მაგრამ სავსე ავზით 600 კილომეტრზე ნაკლები არ გამივლია. თბილისში კი ყოველ ჯერზე სხვადასხვა მანძილს გავდივარ.

ამიტომ, ბოლო ერთი თვე ბენზინს ვასხამ სხვადასხვა ბენზინგასამართ სადგურებში და ვინიშნავ კილომეტრაჟს. მაშ ასე, ქალაქიდან არ გავსულვარ, მარშრუტი იდენტურია და ბოლო ერთი თვის განმავლობაში სავსე ავზით გავიარე:

ვისოლი - 505 კილომეტრი; 

ლუკოილი (არ მინდოდა აქ ჩასხმა რუსეთის ფაქტორიდან გამომდინარე, მაგრამ ექსპერიმენტისთვის საჭირო იყო) – 510 კილომეტრი; 

სოკარი - 525 კილომეტრი;

გალფი - 510 კილომეტრი;

რომპეტროლი - 560 კილომეტრი.

სამწუხაროდ, 600 კილომეტრზე ვერ ავედი ვერცერთი კომპანიით და ყოველ ჯერზე, ვაშინგტონთან შედარებით, 20 დოლარით მეტს ვიხდი..."-წერს შაშკინი.