2014-10-28 13:32

ვრცელდება ინფორმაცია, რომ ტელეკომპანია "მაესტრო" რამდენიმე წამყვანმა ჟურნალისტმა დატოვა.

იმ ჟურნალისტებს შორის, რომლებმაც არხიდან წასვლის გადაწყვეტილება მიიღეს, სახელდებიან დიანა ტრაპაიძე, თეონა გოგელია, მაკა ცინცაძე, სოფო ზურბიანი და ნინო ჟიჟილაშვილი. არხიდან წავიდნენ ასევე ოპერატორებიც.  

დიანა ტრაპაიძე ტელეკომპანიიდან წასვლის თაობაზე ინფორმაციას ადასტურებს. სხვა ჟურნალისტებთან დაკავშირება ამ დროისთვის ვერ ხერხდება. ერთ-ერთი ინფორმაციით, არხიდან ჟურნალისტების წასვლა ფინანსურ პრობლემებს უკავშირდება.

პირველი კომენტარი საჯარო სივრცეში ("ფეისბუქის" საკუთარ გვერდზე) თეონა გეგელიამ გააკეთა:

"თავისუფლება არ არის საკმარისი პირობა მედია ორგანიზაციის ნორმალური ფუნქციონირებისათვის. ჟურნალისტებს სჭირდებათ დაცვა არამხოლოდ პოლიტიკოსებისგან, არამედ უნიჭო, უცოდინარი და არაკომპეტენტური მმართველებისგანაც. ჩვენ გვინდოდა "მაესტროში" მუშაობა. ძალიან ვწუხვარ, ძალიან", - წერს თეონა გეგელია.