საპარლამენტო უმრავლესობის წევრის თინა ხიდაშელის თქმით, როცა საზოგადოება ელის პასუხს, რას უპირისპირებს ხელისუფლება კრიმინალს, სტატისტიკით საუბარი და ყვეკაფრის საზომად ნაცმოძრაობის გამოყენება არ შეიძლება ჩაითვალოს ნორმალურად.
„დავუშვათ მჯერა, რომ ის რასაც იზორია ამბობს, სიმართლეა, რომ 2011 წლის აგვისტოში იმდენივე ან მეტი მკვლელობა მოხდა; ასევე, მჯერა რომ ყველა დანაშაული გახსნილია. ეს რას ცვლის და დღეს შს მინისტრის მოადგილის პასუხი იმაზე, რაზეც საქართველო ღელავს და დარდობს, სტატისტიკა რომ არის ნორმალური არ მგონია, არც ის მგონია ნორმალური ყველაფრის საზომად ნაცმოძრაობა რომ გამოვიყენოთ.
ადვილია იყო მათზე უკეთესი, მაგრამ ეს არ ნიშნავს რომ კარგი ხარ; უფრო მეტიც მას თუ ედრები, მთლად კარგად არც შენ გამოიყურები. საზოგადოება იმას კი არ ელის ჩვენგან რომ „ნაცმოძრაობის“ დროსაც ხდებოდა თურმე დანაშაული და იხსნება, არამედ იმას ამ მკვლელობებთან ბრძოლას როგორ ვაპირებთ; მომეტებულ იარაღთან ბრძოლას როგორ ვაპირებთ; ქალების წინაღმდეგ მოძალადეებს რას ვუპირისპირებთ; ახალგაზრდობის დაცვისათვის რა გეგმა აქვს მთავრობას.
სტატისტიკა და შედარებები შეიძლება ექსპერტებმა აკეთონ, შენგან კი კონკრეტულ ხედვას ელის ყველა“, – წერს თინათინ ხიდაშელი „ფეისბუქში“.
შეგახსენებთ, რომ ერთ თვეში საქართველოში 9 მკვლელობა მოხდა. მოკლულია 11 ადამიანი. ამავე პერიოდში მედიამ დააფიქსირა დაჭრის 4 ფაქტი, დაჭრეს 13 მოქალაქე. 2014 წლის 1–ლი აგვისტოდან 2 სექტემბრის ჩათვლით, ყველაზე მეტი მკვლელობა თბილისშია დაფიქსირებული.
