2015-01-25 23:10

ჟურნალისტი ნანუკა ჟორჟოლიანი სოციალური ქსელიდან პრემიერ-მინისტრ ირაკლი ღარიბაშვილს მიმართავს და მოუწოდებს პოლიციელების სიცოცხლე და ღირსება დაიცვას.

ნანუკა ჟორჟოლიანი გუშინ „რედისონთან“ მომხდარ ფაქტს ეხმაურება, რაზეც „აფხაზეთის ხმა“ ექსკლუზიურად წერდა.

„გუშინ რედისონთან ლაწირაკმა ბიჭმა პატრულს თავში წაარტყა! ვის უბედავ ჯარიმის გამოწერასო. ამ ბიჭის გვარს შეგნებულად არ ვწერ.

მანამდე ლიკანში, ციხიდან გამოსულმა, რამდენჯერმე ნასამართლევმა ადამიანმა მოკლა პოლიციელი.

კიდევ უფრო მანამდე თელავის ცენტრში, ცნობილმა კრიმინალმა ესროლა პოლიციელს! ადგილზე გარდაიცვალა თანამშრომელი!

კიდევ უფრო მანამდე, ბათუმში ქურდის ძმაკაცმა, კლუბში მოკლა პოლიციელი.

ქუთაისში, საკრებულოს ქოცმა წევრმა დაცვის პოლიციის თანამშრომელს პაგონი აახია!

ბატონო პრემიერ-მინისტრო! დაიცავით პოლიციელების სიცოცხლე და ღირსება! ნუ აჩმორებინებთ კრიმინალებს იმ ადამიანების თავს, ვისზეც დგას ქვეყნის უსაფრთხოება, თორემ  ძალიან ცუდად დაამთავრებთ!

„P.S. გუშინ გამოჩეკილმა, ოროსანმა პრესცენტრებმა არ დაიწყონ დაბოლება ხალხის, რომ ყველა პოლიციელი დაცულია! თორემ მივალ მათ უწყებაში კოლეგებთან ერთად და რაც აქ მიწერია, ყველაფერს დისკზე ჩაწერილს მივიტან!“, -წერს ნანუკა ჟორჟოლიანი.

შეგახსენებთ, რომ ინციდენტი სასტუმრო „რედისონთან“ საპატრულო პოლიციის თანამშრომელსა და ლევან გაჩეჩილაძის, იგივე „გრეჩიხას“ უმცროს ვაჟს შორის მოხდა.