2015-01-14 15:39

თბილისის ზოოპარკის ადმინისტრაციის მიმართვის შემდეგ, მოქალაქეებმა გადასაგდებად გამზადებული ჩიჩილაკები ზოოპარკში მიიტანეს.

თუ რა მოხდა ზოოპარკში, ამას ვიდეოკადრებიდან შეიტყობთ.

„თქვენ გგონიათ, ზოოპარკის ბინადრები არ აღნიშნავენ ახალ წელს? ძალიან კარგადაც აღნიშნავენ და საახალწლო სუფრაც აქვთ. მართალია არა გაშლილი, არამედ ჩამოკონწიალებული, მაგრამ მაინც...

დღეს ძველით ახალი წლის სადღესასწაულო განწყობამ ლემურების ვოლიერში შეაბიჯა. ჩვენს გრძელკუდა ფუმფულებს საჩუქრად მორთმეული პირველი ჩიჩილაკებით მოვურთეთ ტერიტორია. ჩიჩიკალები წინასწარ, სათამაშოების ნაცვლად, ხილითა და ბოსტნეულით მოვუკაზმეთ.

ამგვარი, განსხვავებული ფორმით ცხოველისთვის საკვების მიწოდება ზოოპარკის ბინადრების გარემოს გამრავალფეროვნების ერთ-ერთი საშუალებაა. ცხოველები საჭმელს იღებენ ისე, რომ გემრიელი სასუსნავის მოპოვება მათთვის საინტერესო და სახალისო ხდება.

თავიდანვე ცნობისმოყვარედ გამოეფინენ გარეთ, რა განსაკუთრებული დღე გაგვითენდა, ნეტავ რა ხდება ჩვენს თავსო...

მერე კი ბავშვები რომ ნაძვის ხის ქვეშ დაწყობილ საჩუქრებს ეტაკებიან, ესენიც ისე მიესივნენ უცნაურ სიურპრიზებს და სიამოვნებით ჩეჩავდნენ ისედაც გაჩეჩილებს.

ჯერ გემრიელი ფინიკები ამოკრიფეს, მერე ვაშლები, სტაფილოები და ჭარხლები ჩამოწყვიტეს, შემდეგ კი ბურბუშელების პუტვით ირთობდნენ თავს. მოკლედ, ძალიან იხალისეს. ძველით ახალ წელს გილოცავთ, ადამიანებო“, - წერს ზოოპარკის ადმინისტრაცია.