2014-12-08 15:07

30 ნოემბერს, საღამოს 44 წლის გელა ფიცხელაური საკუთარ სადარბაზოსთან ჩაცხრილეს. ბრალდებული, 28 წლის ილია სეფაშვილი სამართალდამცავებმა საზღვარზე დააკავეს.

„ამბობენ, გელას ადრე ილია სეფაშვილის ცოლი ჰყვარებია. მაშინ გოგო 13 წლის ყოფილა.

ცოლობაც უთხოვია ოჯახისთვის, გოგოს მამას უცემია კიდეც - ჩემი ხნის კაცს შვილს არ გავატანო. ეს გოგო მერე თანატოლს შეუყვარდა და ოჯახი შექმნეს.

ქმარი ინგლისში იყო სამუშაოდ წასული. მის ცოლს ქუჩაში დახვედრია გელა და ეს ამბავი გოგოს ქმრისთვის უთქვამს. ილიას თავისი მეგობრებისთვის უთხოვია, ყურადღება მიექციათ მისი ცოლისთვის. ამბობენ, ერთ დღეს მანქანით გზა გადაუჭრაო და ეს აცნობეს ილიას ინგლისში.

გელას გიორგობასაც დაურეკავს გოგოსთვის. ამის მერე ილიას დაურეკავს გელასთვის, ჩემს ცოლს ახლოს არ გაეკაროო. ამას უპასუხია, შენ კედელი ხომ არა ხარ, ვერ გაგწიოო. ისიც გამწარებული ჩამოსულა.

იმ დღესაც უჩხუბიათ, გელას იგივე გაუმეორებია, შენ კედელი ხარო? და მკვლელობა მოხდა", - განაცხადა „კვირის პალიტრასთან“ საუბარში მამაკაცმა, რომელმაც ვინაობის დასახელებისგან თავი შეიკავა.

სამართალდამცავებმა სეფაშვილის დაკავების შემდეგ, მისი სამი თანაკლასელიც დააკავეს - გიორგი სტეფანიშვილს, გიორგი კაბისაშვილსა და ვანო იმერლიშვილს ბრალად დანაშაულის თანამონაწილეობა ედებათ. დაკავებულები დანაშაულს აღიარებენ. როგორც ყვარელში ამბობენ, პოლიციელებმა გიორგი კაბისაშვილს სასტიკად სცემეს.

„არ ვიცი, რა მოხდა, მაგრამ მე მკვლელი შვილი არ გამიზრდია, ჰკითხეთ, ვისაც გინდათ, როგორი შვილი მყავს, ჩვენ ყოველთვის პატიოსანი შრომით ვცხოვრობდით.

გელა ჩემს შვილზე ბევრად უფროსი იყო, ილიას სულ იმას ეუბნებოდა, ჩემი პატარა ძმა ხარო. რა უთანხმოება ჰქონდათ, არ ვიცი. რაც ცოლი შეირთო, გელა ჩვენთან აღარ მინახავს.

ჩემი შვილი 20 წლის იყო, ცოლი რომ მოიყვანა. მეცხრე კლასიდან უყვარდათ ერთმანეთი, ბედნიერები იყვნენ. ერთი გოგო ჰყავთ.

ჩემს შვილს პროცესზე უთქვამს, მისი მოკვლა არ მინდოდაო. ფეხებში უსვრია, სამწუხაროდ, გელა გარდაიცვალა,“ - ამბობს ილია სეფაშვილის დედა.