საქართველოს მესამე პრეზიდენტის მიხეილ სააკაშვილის ხელისუფლების კიდევ ერთი წარმომადგენელი, ეკატერინე ტყეშელაშვილი, შესაძლოა, უკრაინის იუსტიციის მინისტრის მოადგილედ დაინიშნოს. ინფორმაცია უკრაინულ პოლიტფორუმებზე ვრცელდება.
დანიშვნის შემთხვევაში, ეკა ტყეშელაშვილი მესამე იქნება წინა ხელისუფლების წარმომადგენლებიდან, ვინც უკრაინაში პასუხსაგებ თანამდებობას დაიკავებს.
"ნაციონალური მოძრაობის" ერთერთი ლიდერი ნუგზარ წიკლაური უკრაინაში კიდევ ერთ, მისივე თქმით, შოკისმომგვრელ დანიშვნას აანონსებს:
"უკრაინაში ქართველების დანიშვნა გრძელდება, რასაც ისტერიული კომენტარებით შეეგებნენ აქაური ხეპრეები. მაგრამ მთავარი დანიშვნა და მთავარი შოკი წინ არის", - წერს ის. როგორც "აფხაზეთის ხმამ" გაარკვია, ამ სტატუსში არა ეკა ტყეშელაშვილის დანიშვნა არამედ ის საკადრო ცვლილება იგულისხმება, რაც ეკა ტყეშელაშვილის დანიშვნის შემდეგაა მოსალოდნელი უკრაინაში. ნუგზარ წიკლაური დეტალების დაკონკრეტებისგან, ამ ეტაპზე თავს იკავებს.
