2014-12-05 16:08

აღნიშნულის თაობაზე სოციალურ ქსელში  საქართველოს ყოფილი ელჩი საფრანგეთში, მამუკა კუდავა  წერს.

„რატომ მოიწონა ივანიშვილმა უკრაინის მთავრობაში ქართველების გამინისტრება და შესაბამისად ცივი წყალი გადაასხა ოცნების მინისტრებს და პოლიტიკოსებს (რომლებიც 2-3 დღე თუთიყუშივით დაზეპირებული ტექსტით გვიმტკიცებდნენ - ეს დანიშვნები ცუდია და ორმხრივი ურთიერთობები დაზიანდებაო)?

იმიტომ, რომ ჩემი უკრაინული წყაროს მიხედვით, ღარიბაშვილმა დაურეკა პოროშენკოს და ნახევარი საათი სხვადასხვა არგუმენტის გამოყენებით თხოვდა პოლიტიკური მოწინააღმდეგე ქართველების არდამტკიცებას.

უკრაინის პრეზიდენტმა ზრდილობიანად უსმინა, მაგრამ ერთი სურვილი გამოთქვა - რომ ქართველ პრემიერს ამდენ ხანს და ასეთი დაბეჯითებით რუსეთის შემოჭრისას გამოეხატა შეშფოთება და დახმარების მზადყოფნა.

შედეგად მივიღეთ დიპლომატიური მარცხი: ორწლიანი პასიურობის გამო კიევთანაც გაფუჭდა ურთიერთობა და მოსკოვთანაც ვერაფერს მივაღწიეთ "ნორმალიზაციის" ილუზორული პოლიტიკის ფარგლებში.

ასევე მივიღეთ ივანიშვილის მიერ სამართლიანად "გაბანძებული" ოცნების პოლიტხელმძღვანელობა, რომელსაც მესიჯ-ბოქსის შემდგენელ კონსულტანტებთან ერთად მუდმივად უნდა ახსოვდეს: გასაგებია, რომ დავალებული აქვთ, მაგრამ სულელური და რადიკალური მესიჯებით ძალიან თავს ნუ გამოიდებენ, რადგან ბოლო სიტყვას მაინც ივანიშვილი ამბობს", - წერს მამუკა კუდავა.

შეგახსენებთ, ყოფილმა პრემიერ-მინისტრმა ბიძინა ივანიშვილმა აღნიშნა, რომ  უკრაინის მთავრობაში საქართველოს ხელისუფლების ყოფილი მაღალჩინოსნების დანიშვნით უკრაინასა და საქართველოს შორის ურთიერთობა არ გაფუჭდება.