"დვიჟოკი", სანთელი, ლამპის შუშა, ასანთი - ეს სიტყვები "ფეისბუქზე" ყველაზე ხშირად შეგხვდებოდათ გუშინ, როცა სრულიად საქართველო სრულიად მოულოდნელად ჩაბნელდა.
შეგახსენებთ, დაახლოებით 3.00 საათზე საქართველოს ენერგოსისტემა მთლიანად გაითიშა. ის რამდენიმე საათის განმავლობაში პარალიზებული იყო, რამაც დენის მიწოდების შეწყვეტა გამოიწვია როგორც თბილისში, ასევე საქართველოს თითქმის ყველა ქალაქში. შუქი ავარიულად, თანდათანობით ჩაქრა.
დილიდან უკვე ცნობილია, რომ საქართველოს ელექტროსისტემის პარალიზება გარდაბნის თბოელექტროსადგურზე მომხდარმა ავარიამ გამოიწვია. როგორც ენერგეტიკის მინისტრმა კახა კალაძემ განაცხადა, "ელექტროენერგიის აღდგენის მიწოდება 15 წუთში დავიწყეთ დასავლეთ საქართველოდან, პირველი იყო ზუგდიდი, შემდეგ კი, დაახლოებით 4.00 საათისთვის, დედაქალაქის უბნებისთვის დენის მიწოდება დაიწყო და ეტაპობრივად გაგრძელდა".
კახა კალაძის ფოტო, რომელიც სადისპეტჩერო ფარის დარბაზშია გადაღებული, ენერგეტიკის სამინისტროს პრესსამსახურის ხელმძღვანელმა "ფეისბუქზე" გამოაქვეყნა და ახლა ის გახდა საყოველთაო ქილიკის საგანი: "მე მგონი, ეს ფეხბურთს ვარჯიშობდა"; "კიდევ კარგი, შარვლის ამოცმა მაინც მოასწრო, ეტყობა, ლოგინიდან როა წამომხტარი", - ანგლობდნენ "ფეისბუქზე". მოგვიანებით, როცა კალაძემ ტვ-ებს მისცა ინტერვიუ, ის უკვე კლასიკურად ჩაცმული იყო.
გივი თარგამაძემ, რომელიც პრემიერმინისტრ ირაკლი ღარიბაშვილის მეზობლად ცხოვრობს, მისი ბინის ფანჯრები გადაიღო და "ფეისბუქზე" გამოაქვეყნა, ხოლო კახა კალაძეს "საკუთარ კარში ორგოლოსანი" უწოდა:
"ჰაკიმ, შვილო, ისევ ჩაი...? სიომდაუბერა? დილიდან ქარი რომ იყო, გულმა მაინც არ გიყო რეჩხი? კალა, საკუთარ კარში ორგოლოსანო, სად ხარ, აქედან გადაშენდი? უნიათოებო ! ! ! უვარგისებო! ხელისუფლების არამსგავსებო! გამორთეთ გენერატორები და იჯექით ხალხის მსგავსად, სანამ არ გაანათებთ, ან არგაგინათდებათ. მთელ ქვეყანაში მარტო ჰაკიმის და კალას ბინები რომაა გაბრდღვიალებული, და შუშის სასახლე, ზვიგენს მოვკითხოთ?", - წერს თარგამაძე.
მოგვიანებით, როცა უკვე ელექტროენერგიის მიწოდების აღდგენა დაიწყო, გივი თარგამაძემ კიდევ ერთხელ იაქტიურა:
"პირველი მოსაშვილზე მოვიდა. "დვიჟოკიც" ენანება, დიდხანს რომ ამუშაოს".
გოგა ხაჩიძემ ნავთის ლამპის ფოტო გამოაქვეყნა და წარწერაც დაურთო: "ნუ გეშინია, შვილო, ეს არ ისვრის. ამაში ნავთს ასხამენ და ანათებს".
ანალოგიური იყო სხვა მოქალაქეების, "ფეისბუქის" მომხმარებლების რეაქცია, რასაც მათ მიერ გამოქვეყნებული ფოტოებიც მოწმობს.
