-
2014-08-28 06:12
რუსეთმა უკრაინაში სამხედრო შეჭრა განახორციელა და თავის ჯარისკაცებსა და მათ ოჯახებს ატყუებს. ამის შესახებ 27 აგვისტოს აშშ-ის სახელმწიფო დეპარტამენტის ოფიციალურმა წარმომადგენელმა ჯენიფერ რენე ფსაკიმ ვაშინგტონში გამართულ ბრიფინგზე განაცხადა.
„ყველა მონაცემი ცხადყოფს, რომ მიმდინარეობს კონტშეტევა რუსი სამხედროების მხრიდან დონეცკისა და ლუგანსკის მიმართულებით“, - განაცხადა მან და დაამატა, რომ რუსეთის ხელისუფლება ატყუებს საკუთარ სამხედროებსა და მათ ოჯახებს.
„შეშფოთებულნი ვართ იმის გამო, რომ რუსეთის ხელისუფლებას არ სურს, აღიაროს სიმართლე იმის მიუხედავად, რომ სამხედროები უკრაინის სიღრმეში უკვე 40 კმ-ით არიან შეჭრილი“, - განაცხადა ფსაკიმ.
ფსაკიმ ასევე აღნიშნა, რომ აშშ თვალს ადევნებს შეტყობინებებს, რომლის თანახმადაც რუსი ჯარისკაცების გაურკვეველ ვიტარებაში დაღუპვის ფაქტებს მათ სამშობლოში მალავენ. ფსაკიმ ასევე ახსენა სანკტ-პეტერბურგის ჰოსპიტალში გადაყვანილი დაჭრილი რუსი სამხედროები.
შეგახსენებთ, რომ რუსეთში ცალკეულმა მედიასაშუალებებმა უკვე 400-ზე მეტი დაჭრილი და ლიკვიდირებული სამხედრო მოსამსახურე დათვალეს. ამასთან, რუსეთის პრეზიდენტის პრესსპიკერმა პესკოვმა არ დაადასტურა რუსი სამხედროების მასობრივი დაკრძალვის ფაქტები და განაცხადა, რომ ფაქტები დამატებით შესწავლას საჭიროებს.
ამასთან, უკრაინაში ტყვედ აყვანილმა რუსეთის შეიარაღებული ძალების საჰაერო-სადესანტო ჯარების 98-ე სვირის დივიზიის 331-ე პოლკის მოსამსახურეებმა განაცხადეს, რომ არ აპირებენ ბრძოლას უკრაინელი ხალხის წინააღმდეგ.
რუსეთის ფედერაციის თავდაცვის სამინისტრომ, გააკეთა რა კომენტარი სამხედროების ტყვედ აყვანის შესახებ, განაცხადა, რომ მათ უკრაინის საზღვარი შემთხვევით გადაკვეთეს.