მთიანი ყარაბაღის ტერიტორიაზე შეიარაღებული კონფლიქტის განახლებაზე სომხური და აზერბაიჯანული მედიასაშუალებები სხვადასხვა ცნობებს ავრცელებენ.
სომხური მედიის ცნობით, აზერბაიჯანის მიერ წამოწყებულ შეტაკებებში მოწინააღმდეგემ 7 სამხედრო დაკარგა, აზერბაიჯანის თავდაცვის სამინისტრო კი 4 ჯარისკაცის დაღუპვას ადასტურებს.
მთიან ყარაბაღში მდგომარეობა 27 ივლისიდან დაიძაბა, დაძაბულობამ კი პიკს 1-დან 2 აგვისტოს ღამეს მიაღწია. სომხური მედიისა და ქვეყნის ოფიციალური პირების ცნობით, აზერბაიჯანის სპეცდანიშნულების რაზმების მხრიდან დივერსიის მცდელობა აღკვეთილია და ლიკვიდირებულია 7 ჯარისკაცი, თუმცა, აზერბაიჯანის მხარე 4 სამხედრო პირის დაღუპვას ადასტურებს.
აზერბაიჯანული მედიის ცნობით, სომხურმა მხარემ ცეცხლის შეწყვეტის შესახებ შეთანხმება დაარღვია და ოთხი აზერბაიჯანელი სამხედრო მოსამსახურე მოკლა, რის შემდეგაც ოფიციალურმა ბაქომ გასცა ბრძანება, სომხეთის მიმართულებით ცეცხლის გახსნის შესახებ მსხვილკალიბრიანი ირაღიდან. ერთერთი ვერსიით, აზერბაიჯანული მხარე სარაკეტო დანადგარებსაც იყენებს, თუმცა, ეს ფაქტი ოფიციალურად არ დასტურდება.
სომხური მხარის მიერ გავრცელებული ინფორმაციით კი, აზერბაიჯანულმა მხარემ 27 ივლისიდან 2 აგვისტომდე პერიოდში ცეცხლის შეწყვეტის ზონის მიმართულებით 16.500 გასროლა მოახდინა, მათ შორის, მსხვილკალიბრიანი იარაღიდანაც.
თვითგამოცხადებული მთიანი ყარაბაღის რესპუბლიკის თავდაცვის სამინიტროს ცნობით, აზერბაიჯანმა გასულ ღამეს 5 სამხედრო მოსამსახურე დაკარგა, სამი კი დაიჭრა. სროლა და შეტაკებები სამხრეთ-აღმოსავლეთით, მარტაკერტის მიდამოებში მიმდინარეობდა.
რაც შეეხება აღმოსავლეთის მიმართულებას, ამავე წყაროს ცნობით, მოკლულია 2 და დაჭრილია 4 აზერბაიჯანელი სამხედრო მოსამსახურე.