უკრაინაში მიმდინარე ანტიტერორისტულ სპეცოპერაციასთან მიმართებაში არსებულ მონაცემებს აქვეყნებს და 2 ივლისისთვის არსებულ შედეგებს აჯამებს „ინფორმაციული წინააღმდეგობის ფრონტის“ ლიდერი დიმიტრი ტიმჩუკი.
ეყრდნობა რა ოფიციალურ მონაცემებს, ტიმჩუკი წერს, რომ ანტიტერორისტული სპეცოპერაციის დაწყებიდან 2 ივლისამდე უკრაინის შეიარაღებული ძალების 200 სამხედრო მოსამსახურე დაიღუპა, 619 კი დაიჭრა. ამ დრომდე ტერორისტთა ტყვეობაში რჩება 29 სამხედრო მოსამსახურე.
მძიმეა სურათი მშვიდობიან მოსახლეობაში მსხვერპლის კუთხითაც: მხოლოდ დონეცკის ოლქში ამ პერიოდში 160 მოქალაქეა დაღუპული, მათ შორის, ბავშვებიც.
მიმდინარე ამბები ანტიტერორისტული სპეცოპერაციის ზონიდან:
2 ივლისს „იზვარინოს“ სასაზღვრო-გამშვებ პუნქტთან ფუგასურ ნაღმზე აფეთქდა უკრაინელი ძალოვნების ქვეითთა საბრძოლო მანქანა. მოგვიანებით ტერორისტებმა ამ პუნქტის მისამართით საარტილერიო ცეცხლი გახსნეს. ტიმჩუკი წერს, რომ ბოევიკები ასე ადვილად არ დათმობენ რუსეთთან სახელმწიფო საზღვრის მისადგომებს, რადგან კარგად ესმით, რომ ამ ხაზის მოშლა დონბასში ტერორიზმის აღკვეთის მაუწყებელი იქნება.
მისივე თქმით, როგორც კი უკრაინელი ძალოვნები ამყარებენ კონტროლს ბოევიკების ატიურობით გამორჩეულ სასაზღვრო ზონაში, ისინი იწყებენ პერიმეტრის დანაღმვას და სასაზღვრო პუნქტების საარტილერიო დამუშავებას, რის გამოც ტიმჩუკი მიიჩნევს, რომ საზღვრის ზოლისთვის ბრძოლა მხოლოდ ახლა იწყება.
ტიმჩუკის თქმით, ანტიტერორისტული სპეცოპერაცია გადამწყვეტ ფაზაში შევიდა: მხოლოდ 1 ივლისის მონაცემებით, ძალოვნებმა დარტყმები მიაყენეს 120 ობიექტს, სადაც ტერორისტები იყვნენ გამაგრებული და ეს მოხდა დაზვერვითი სამუშაოების ჩატარების შემდეგ, მხოლოდ იმის გათვალისწინებით, რომ იმ ობიექტებზე მშვიდობიანი მოსახლეობა არ იმყოფებოდა.