2014-08-28 15:21

 დედაქალაქში კაიროს ქუჩაზე მომხდარმა შემთხვევამ ბოლო დროს გახმაურებული პედოფილიის შემთხვევები ეჭვის ქვეშ დააყენა.

ინციდენტი 12 წლის გოგონას და მის მიერ პედოფილიაში დადანაშაულებულ 65 წლის მამაკაცს ეხებოდა.

გოგონა ამტკიცებდა, რომ მამაკაცი მას ფულს იმისთვის ჩუქნიდა, რომ მასთან სქესობრივი კავშირს დაემყარებინა. გამოძიებამ დაადასტურა, რომ ბავშვი ცრუობდა.

ლ.კ, კაიროს ქუჩის მკვიდრი:

- ეს რა გაუკეთა ოჯახის კაცს, როგორ დააბრალა, ჩემი გაუპატიურება უნდოდაო! კიდევ, კარგი, იმ კაცს მაგარი გული აღმოაჩნდა, თორემ სხვა მოკვდებოდა მაგის ადგილზე. როგორია, კაცს არავისთვის არასოდეს არაფერი დაუშავებია და ახლა პოლიცია თავზე დაადგა! ამ ოჯახის კაცს ეს თავზეხელაღებული ბავშვი კლავდა!

ამ ბავშვის დედა სვამს, მამა კია მშრომელი და პატიოსანი კაცი, მაგრამ ასეთ თავზეხელაღებულ გოგოსთან რა უნდა გააწყოს! ძალიან საეჭვო ბავშვია, ერთხელ ვარკეთილის ბარაკებიდან მოვიდა ისეთი ნაცემი ვიღაც ბიჭებისაგან, მეზობლებს შეეცოდათ და უპატრონეს, მთვრალი დედამისი კი საწოლზე ეგდო და ეძინა...

ამ კაცის ოჯახი, ვისაც ასეთი საშინელება დააბრალა, სინამდვილეში ამ ბავშვს პატრონობდა; პურის და ხანდახან ნაყინის ფულსაც კი აძლევდნენ, ბავშვი თავად მიადგებოდა ხოლმე, - ცოტა ფული მომეცითო.

...სადღაც 20 ლარი მოიპარა. ერთი მეზობელი ჰყავს, ისიც ქალია, დედამისთან მეგობრობს და იმ ქალს უკითხავს, ეგ ფული საიდან გაქვსო. ეტყობა, შეშინდა და მაშინ დაადო იმ კაცს ხელი, - ეგ ბიძია კარტს მეთამაშებოდა, მერე კიდევ გამაუპატიურა და ფული მომცაო.

იმ მეზობელმა დაურეკა პოლიციას, თორემ სიმართლე რომ ითქვას, ბავშვის მამას ეგ ამბავი არც დაუჯერებია...

ბოლოს გამომძიებელთან თქვა - აბა, რა მეთქვა, შემეშინდა, რომ ფული მოვიპარე და იმიტომ დავაბრალე ეს ამბავი ბიძიასო.

ეს გოგო ქუჩაში ისევ ჩვეულებრივად დადის და თამაშობს. ფაქტია, რომ ის ამ ოჯახისთვის საფრთხედ იქცა, ხვალ სხვა ოჯახისთვის იქცევა და ასე შემდეგ. ამ ამბავს საშველი არ ექნება.

„კვირის პალიტრა“