-
2017-06-21 15:29
დეკანოზ გიორგი მამალაძის ოჯახი პატრიარქს შეხვდა. როგორც ბრალდებულის ძმა ამბობს, შეხვედრაზე საუბარი იწერებოდა, საპატრიარქოს წარმომადგენლების განმარტებით, ჩანაწერი ოჯახის მხრიდან ინტერპრეტაციების თავიდან აცილების მიზნით გაკეთდა.
თორნიკე მამალაძე ამბობს, რომ მამა დავით ჭინჭარაული და სხვა დამსწრე სასულიერო პირები უწმინდესს და დეკნაოზის ოჯახის წევრებს საუბარს აწყვეტინებდნენ და ცდილობდნენ პატრიარქისთვის პოზიციის დაფიქსირების საშუალება არ მიეცათ.
„უწმინდესმა ბოლომდე მოგვისმინა, მიუხედავად იმისა, რომ მამა დავით ჭინჭარაული ცდილობდა ჩვენი საუბარი შეეწყვიტა და ჩაეკვეხებინა სიტყვები. ცდილობდა გაეწყვიტა ჩვენი საუბარი პატრიარქთან , რაზეც მე კატეგორიულად ვეუბნებოდი, რომ მე პატრიარქთან საუბარი მსურდა პირადად. ყოველი ჩემი ახალი წამოწყებული თემა ცდილობდნენ, რომ შეეწყვიტათ.
ცდილობდა მამა დავით ჯინჭარაული. მოდიოდა ჩემთან ზურგს უკან და ხელსაც მადებდა, რატომღაც მიტევდა და მეუბნებოდა რომ ყველაფერი კარგად იქნებაო. ჩვენი საუბარი ყველაფერი უწმინდესთან იწერებოდა. გამომდინარე იქედან, რომ გვეუბნებოდნენ, რომ გახვალთ და შემდეგ ტყუილს იტყვითო. ჩვენ ტყუილის თქმა არ გვჭირდება.
პატრიარქმა როგორც გერმანიიდან ჩამობრძანების შემდეგ, დააფიქსირა ისევ ის პოზიცია და თქვა, რომ მე მამა გიორგისგან არასდროს გამიგია ცუდიო და ეს ყველაფერი არის საქართველოს დისკრედიტაციის მცდელობა. მამა გიორგის დაჭერა მიმართულია საქართველოს დისკრედიტაციისაკენ.
პატრიარქის საუბრის შეწყვეტასაც ცდილობდნენ, სიტყვას აწყვეტინებდნენ, რაზეც ჩვენი მხრიდან იყო საუბარი რომ გვადროვეთ, რადგან დიდი ხანი ველოდებოდით. პატრიარქმა დაგვლოცა, პატრიარქმა ჩვენი ინფორმაცია მოისმინა და ბევრ თემებზე გვქონდა საუბარი,“-განაცხადა დეკანოზ გიორგი მამალაძის ძმამ.