საბერძნეთში ქართველი ემიგრანტი ქალის დიანა ბერიძის მკვლელობის საქმეზე, სამართალდამცველებმა კიდევ 2 ქალი დააკავეს. ამის შესახებ "რუსთავი 2"-თან საუბარში მოკლულის მამიდამ ნაზი ბერიძემ განაცხადა.
ნაზი ბერიძის თქმით, მკვლელობა ექიმის შეცდომას უკავშირდება, რადგან გარდაცვლილის ორგანიზმში საანესთეზიო წამლის ზედმეტი დოზა აღმოჩნდა.
"დადასტურებულია, რომ ორი ქალი არის კიდევ დაკავებული. ეს არის ექიმის შეცდომა. როგორც ჩვენ დავადგინეთ, წამლის ზედმეტი დოზა აქვს მიცემული, რის გამოც ავადმყოფმა ვეღარ გამოიღვიძა.
რომ შემოაკვდა გოგო, მას შემდეგ იმავე დღეს, ღამის 11:00 საათზე 150 კილომეტრით დაშორებული სოფლის ტყეში ყავს წაყვანილი. ცხედარი სანახევროდ დანაწევრებულია. მას ჯერ ვერ ვმარხავთ ექსპერტიზიდან გამომდინარე. ექსპერტიც მუშაობს, რათა დადგინდეს გოგონას შინაგანი ორგანოები ხომ არ არის გაყიდული", - განაცხადა ნაზი ბერიძემ.
26 აპრილს თესალონიკის "იპოკრატიოს" 38 წლის ბერძენმა ანგიოქირურგმა 36 წლის ქართველი ემიგრანტი ქალი მოკლა. მოკლული ქალის გვამი 3 მაისს იპოვეს ხალკიდიკის სოფელი პალიურის (თესალონიკიდან 120 კმ-ის დაშორებით, სამხრეთ-აღმოსავლეთის მიმართულებით) მიდამოებში, ხრწნის წინწასულ სტადიაში.
ქალის ორგანიზმში აღმოჩენილი იქნა საანესთეზიო ნივთიერების კვალი. ბრალდებული დაკავებულია და მიმდინარეობს საგამოძიებო პროცესი. ბრალდებულმა პროკურორთან ბრალის აღიარების ვადის გადადება ორშაბათამდე მოითხოვა.