-
2017-04-20 14:57
შავ ზღვაში სამაშველო ოპერაციისას ნაპოვნ სამ გარდაცვლილს შორის საქართველოს მოქალაქე არ აღმოჩნდა, - ამის შესახებ ინფორმაცია "პირველ არხს" საზღვაო სააგენტოში დაუდასტურეს.
19 აპრილს ჩაძირული სატვირთო გემის ეკიპაჟის წევრების ძებნა-გადარჩენის ოპერაცია გრძელდება. პანამის დროშის ქვეშ მცურავ გემზე ეკიპაჟის 12 წევრი, მათ შორის საქართველოს მოქალაქეც იმყოფებოდა.
გუშინ მაშველებმა ერთი ადამიანი გადაარჩინეს და სამი ცხედარი იპოვეს, რომელთა იდენტიფიცირება ცოტა ხნის წინ დასრულდა და მათ შორის საქართველოს მოქალაქე არ აღმოჩნდა.
შეგახსენებთ, 19 აპრილს, დილით პანამის დროშის ქვეშ მცურავი სატვირთო გემი შავ ზღვის აკვატორიაში ჩაიძირა. სატვირთო გემი „გეროი არსენალა“ აზოვის პორტიდან თურქეთისკენ მიემართებოდა და მარცვლეულით იყო დატვირთული.