მედიაჰოლდინგ „აფხაზეთის ხმის“ დამფუძნებელი, მომღერალი ნინო ჩხეიძე უარყოფს ბოლო დროის განმავლობაში გავრცელებულ ხმებს იმის თაობაზე რომ მედიაჰოლდინგი იხურება ან/და მისი გაყიდვაა დაგეგმილი.
„ბოლო დროს საზოგადოების ნაწილში და სოციალურ ქსელებში, ასევე, ცალკეულ მედიასაშუალებებში გავრცელებულ ინფორმაციასთან დაკავშირებით გვინდა განვაცხადოთ, რომ მედიაჰოლდინგი „აფხაზეთის ხმა“ ჩვეულ რეჟიმში აგრძელებს საქმიანობას და მასში შემავალი მედიარესურსების მუშაობის შეწყვეტა ან სხვა შეზღუდვა არ განიხილება, ასევე არ დგას დღის წესრიგში რაიმე მიზეზით მედიაჰოლდინგის დახურვა ან გასხვისება.
ჩვენი ადამიანური რესურსის, მენეჯმენტის პრიორიტეტული საქმიანობა გახლავთ მედიაჰოლდინგის განვითარება და ყველა მოსალოდნელი, შიდასტრუქტურული ცვლილება მხოლოდდამხოლოდ ამ მიზნისთვის იქნება გამოყენებული.
ვსარგებლობთ შემთხვევით და მადლობას ვუხდით ჩვენს ერთგულ მსმენელებს, მაყურებლებსა და მკითხველებს, რომლებიც გავრცელებულ ხმებთან დაკავშირებით მოგვმართავენ და ჩვენი მომავლით ინტერესდებიან. შეგვიძლია მათ დაზუსტებით ვუთხრათ, რომ მედიაჰოლდინგის დახურვასთან/გაყიდვასთან დაკავშირებული ხმები არ ასახავს რეალობას და, შესაბამისად, არანაირი საფუძველი არ გააჩნია“, - ნათქვამია მედიაჰოლდინგის დამფუძნებლის განცხადებაში.