მარტვილში, მდინარე აბაშის კანიონთან ტრაგედია დატრიალდა. მდინარეში ხიდიდან გადამხტარი 17 წლის მიხო ბერიშვილის ცხედარი უკვე იპოვეს, ხოლო მისი სამაშველო ოპერაციის დროს გაუჩინარებული პროფესიონალი სპალეოლოგისა და მყვინთავის ელგუჯა ჯამრიშვილის ცხედარს ისევ ეძებენ. სამძებრო სამუშაოებს კოკისპირული წვიმა, ჩქარი დინება და ამღვრეული წყალი ართულებს.
"აფხაზეთის ხმისთვის" ტრაგედიის დეტალები გახდა ცნობილი: მიხო ბერიშვილი სხვა ბავშვებთან ერთად მდინარეში ბანაობდა. ეს ის ადგილია, სადაც ბავშვები ძალიან ხშირად დადიან და ხიდიდან წყალში ხტებიან ხოლმე. იქვეა წისქვილი და მცირე ჩანჩქერი, რაც მდინარეში ბანაობას მოზარდებისთვის ექსტრიმის ელემენტებსაც სძენს. ბავშვებთან ერთად მიხო ბერიშვილის ძმაც იმყოფებოდა.
მორიგი გადახტომის შემდეგ მიხო ბერიშვილი წყლის ზედაპირზე ამოტივტივდა, მაგრამ სავარაუდოდ, გადახტომის დროს ფსკერს თავი ან სხეულის სხვა ნაწილი დაარტყა, რის გამოც, ამოტივტივების შემდეგ, დინებას წინააღმდეგობა ვერ გაუწია და წყალმა ჩანჩქერისკენ წაიღო. ამ სურათს მისი ძმაც ადევნებდა თვალს. როცა ბავშვებმა მიხო ბერიშვილი თვალთახედვის არედან დაკარგეს, ამის შესახებ უფროსებს შეატყობინეს, რის შემდეგაც ადგილზე ჯერ ადგილობრივი, ხოლო შემდეგ რეგიონალური მასშტაბით მაშველები გავიდნენ.
სწორედ ამ რეგიონალურ მაშველთა ნაკადში, საგანგებო თხოვნით იყო ჩართული გუჯა ჯამრიშვილი, მისი მეწყვილე კი ვაჟიშვილი იყო. ჩვენი ინფორმაციით, ელგუჯა ჯამრიშვილმა რამდენჯერმე ჩაყვინთა წყალში, ხოლო ერთ-ერთი ჩაყვინთვის შემდეგ თოკი მოეშვა და ზედაპირზე აკვალანგი ამოტივტივდა. ამის შემდეგ მყვინთავი არავის უნახავს.
17 წლის მიხო ბერიშვილის ცხედარი დღეს დინების მიერ გამორიყული, შემთხვევის ადგილიდან დაახლოებით ნახევარ კმ-ში იპოვეს, თუმცა, მყვინთავის ცხედარი ამ დრომდე არაა ნაპოვნი.
ამ ადგილას ეს პირველი შემთხვევა არ არის, როცა ექსტრემალური სიტუაცია იქმნება. შარშან ზაფხულში ექსკუსიაზე მყოფი თანაკლასელები სწორედ აქ ჩარჩნენ წყალდიდობის დროს, როცა ნავებით სეირნობდნენ. მაშინ ერთი ნავი და მაშველი წყალმა წაიღო, მაგრამ მან მოშორებით, დამოუკიდებლად მოახერხა ნაპირზე გასვლა, ხოლო ბავშვები უვნებლად გამოიყვანეს.
