2016-04-22 02:20

წაქცეული განათების ბოძები საბურთალოზე, ასევე საბურთალოზე, რამდენიმე დაზიანებული ავტომანქანა, რომელთაც წაქცეული ხეები დაეცა, საგანგებო რეჟიმზე გადასული სამაშველო სამსახური და უთვალავი გამოძახება 112-ზე - ასეთია თბილისში ღამით ამოვარდნილი ძლიერი ქარის პირველი შედეგები. 

ფოტოზე, რომელიც თვითმხილველმა საბურთალოზე გადაიღო, საცხოვრებელ კორპუსთან გაჩერებული ავტომანქანაა გადაღებული, რომელსაც ქარისგან წაქცეული ხე დაეცა. ამ ადგილას სიტუაცია ნორმალიზებულია - ხის ნარჩენებისგან ადგილი სამაშველო სამსახურის წარმომადგენლებთან ერთად მოსახლეობამაც გაწმინდა.

რთული მდგომარეობა იყო 5 დეკემბრის ქუჩაზე. რამდენიმე შემთხვევაში მანქანაში, რომელსაც ხე დაეცა, მგზავრები ისხდნენ, თუმცა, ამ დრომდე არ გავრცელებულა განცხადება ტრავმირების შესახებ. ცოტა ხნის წინ დედაქალაქის რამდენიმე უბანში ქარს თან წვიმა დაერთო. ყველაზე მეტი გამოძახება 112-ზე ისანი-სამგორის რაიონშია დაფიქსირებული.