-
2016-03-11 16:11
ტელეწამყვანი, ჟურნალისტი ინგა გრიგოლია საგანგებო განცხადებას ტვ "პირველის" ეთერში, საინფორმაციო პროგრამის დასაწყისშივე ავრცელებს და მოუწოდებს სამართალდამცველებს, აღკვეთონ უმსგავსობა, რომელიც ბოლო რამდენიმე საათია, "ფეისბუქზე" შეიმჩნევა.
"ბოლო რამდენიმე საათია, ჟურნალისტებს, ჩემს კოლეგებს, "ფეისბუქში", ინბოქსში მისდით ერთერთი ოპოზიციონერი პოლიტიკოსის პირადი ცხოვრების ამსახველი ფარული ჩანაწერები. მე იმედი მაქვს, რომ არცერთი ჩემი კოლეგა, არცერთი ტელევიზიიდან, არცერთი სააგენტოდან, არ იკადრებს ამ კადრების გავრცელებას, ხოლო ჩემი მხრივ, როგორც ერთი ჟურნალისტი, მოვუწოდებ ქვეყნის პრეზიდენტს, პარლამენტის თავმჯდომარეს, შინაგან საქმეთა სამინისტროს, უშიშროების სამსახურს და პროკურატურას - დროულად აღკვეთონ ეს ამბავი და გამოიძიონ, რა ხდება, ვინ ავრცელებს ოპოზიციონერი პოლიტიკოსის შესახებ ფარულ ჩანაწერებს", - განაცხადა ინგა გრიგოლიამ ტვ "პირველის" ეთერში.
ინგა გრიგოლიას მიმართვას უერთდება მედიაჰოლდინგი "აფხაზეთის ხმა". თავისთავად ცხადია, ნებისმიერი საშუალებით მიღებული მსგავსი კადრების გავრცელებაზე უარს ამბობს ჰოლდინგში შემავალი ყველა მედიარესურსი, ამასთან, მოვითხოვთ, შესაბამისმა ორგანოებმა უმოკლეს ვადაში დაადგინონ ფარული, უკანანო ჩანაწერების გავრცელების ინიციატორთა და შემსრულებელთა ვინაობა.