2016-02-13 17:08

ციხისძირში ჩასულმა ყოფილმა პრემიერმინისტრმა ბიძინა ივანიშვილმა მითითება მისცა ხეების გადატანით დაკავებული კომპანიის წარმომადგენლებს, რომ პროცესი შეაჩერონ, სანამ "ყველაფერი გაირკვევა". ამის შესახებ კომპანია "ზიმოს" დირექტორმა განაცხადა. 

მისი თქმით, აქვს ყველა საჭირო საბუთი, ერთის გარდა: ვერ მოხერხდა ფიზიკურ პირთან დაკავშირება, რომელიც ლიანდაგიდან ზღვის სანაპირომდე მდებარე მიწის მესაკუთრეა და რადგან ოფშორშია რეგისტრირებული, ვერ იპოვეს. 

დანარჩენი საბუთები ყველა საჭირო უწყებიდან კომპანიამ მოკლე ვადებში მოიპოვა:

"აჭარის მთავრობისგან ხეების შეძენის დოკუმენტი მაქვს, რკინიგზის დეპარტამენტისგან მაქვს ნებართვა, რომ ამ ლიანდაგის იქეთ გადავიტან ხეებს. გზების დეპარტამენტი აკონტროლებს ზღვასთან მისვლის საკითხს და მათგან მაქვს უფლება, რომ ეს სამუშაოები შევასრულო. ერთადერთი, რაც არა მაქვს, ეს არის კერძო მესაკუთრისგან ნებართვა, რომელიც არ არის საქართველოს მოქალაქე, მისი კომპანია დარეგისტრირებულია ოფშორულ ზონაში, პანამაში და მეპატრონეს ვერ ვპოულობთ. ლიანდაგიდან ზღვის სანაპირომდე ტერიტორია ეკუთვნის ამ პირს," - აღნიშნა ზურაბ კიკნაძემ და დასძინა,  "თუ ჩემი პასუხისმგებლობის საკითხი დადგება, პასუხსაც ვაგებ".  

"ბატონმა ბიძინა ივანიშვილმა შეაჩერა სამუშაოები. გვითხრა, გაარკვიეთ ყველაფერი და დაალაგეთ სიტუაცია. როგორც კი მოგვარდება ყველაფერი, შემდეგ გააგრძელეთ სამუშაოებიო," - ამბობს "ზიმოს" დირექტორი.