თბილისის შიდასაქალაქო მიკროავტობუსებში მხოლოდ ერთი, რეჟისორ გოგა ხაინდრავას კუთვნილი რადიო "თანამგზავრის" მაუწყებლობის წინააღმდეგ პეტიცია შემუშავდა და სოციალურ ქსელებში ქვეყნდება.
პეტიციის ავტორი მედიაჰოლდინგ "აფხაზეთის ხმის" საინფორმაციო სამსახურის უფროსი ლაშა ბერულავაა, რომელიც აცხადებს, რომ ხელშეკრულება, რომელიც შპს "თბილისის მიკროავტობუსის” მმართველობის ქვეშ მყოფ კომპანიებთან გოგა ხაინდრავას კომპანიამ გააფორმა, თავისუფალი არჩევანის უფლებას უზღუდავს მოქალაქეებს:
"თავად მე ამ შემთხვევაში რადიო "აფხაზეთის ხმისა" და ჰოლდინგში შემავალი "დარდიმანდისა" და "შანსონის" ინტერესები მალაპარაკებს, მაგრამ უამრავი სხვა რადიო არსებობს, რომლებიც ამ ხელშეკრულებას ეწინააღმდეგებიან. არ მინდა დავასახელო, მაგრამ ერთერთმა კომპანიამ, რომელიც რადიომაუწყებელიცაა და ტელემაუწყებელიც, მთელი დღე ამუშავა ჟურნალისტი ამ თემაზე, მაგრამ საბოლოოდ, ტელესიუჟეტი დაიბლოკა იმის გამო, რომ ერთერთი თანამფლობელის ინტერესების საწინააღმდეგო აღმოჩნდა.
ცნობილია, რომ ამ მედიასასაშუალებაში, სადაც სიუჟეტი დაიბლოკა, გოგა ხაინდრავას წილი არა აქვს. ესე იგი, შეგვიძლია ვივარაუდოთ, რომ გადაწყვეტილება მიკროავტობუსებში მხოლოდ "თანამგზავრის" მაუწყებლობის შესახებ არ არის მხოლოდ რეკლამისა და თვითდამკვიდრების მიზნით მოფიქრებული - აქ, ჩემი აზრით, პოლიტიკური ინტერესები დევს, მით უმეტეს, რადიოს საინფორმაციო ლიცენზია აქვს. არჩევნები ახლოვდება, ამომრჩეველზე ამგვარი, თუნდაც ირიბი ზემოქმედება კი ხელისუფლებასა და მასთან დაახლოებულ კომპანიებს ჰაერივით სჭირდებათ...
ამასთან, ისიც სათქმელია, რომ ზოგიერთ მგზავრს არათუ "თანამგზავრის" ან თუნდაც "აფხაზეთის ხმის", არამედ არცერთი რადიოს მოსმენა არ უნდა მიკროავტობუსში და რატომ უნდა იყოს ვალდებული, რომ მხოლოდ ერთ რადიოს უსმინოს?", - ამბობს ლაშა ბერულავა.
პეტიციაში, რომელზე ხელმოწერაც ამ ბმულზეა შესაძლებელი, აღნიშნულია:
"2015 წელის 1 დეკემბერს ხაინდრავას კომპანიამ ხელშეკრულება შპს "თბილისის მიკროავტობუსის” მმართველობის ქვეშ მყოფ კომპანიებთან გააფორმა.
სწორედ ამ ხელშეკრულების საფუძველზე, რადიო „თანამგზავრი“ მიკროავტობუსებში ჩართული ერთადერთი რადიო უნდა გახდეს, რისთვისაც ხაინდრავას კომპანია "თბილისის მიკროავტობუსს” 5 ათას ლარს გადაუხდის.
მიმაჩნია, რომ ეს შეთანხმება რადიო „თანამგზავრს“ აყენებს პრივილეგირებულ მდგომარეობაში სხვა რადიომაუწყებლებთან შედარებით, ამასთან, ვფიქრობ, ხელშეკრულება არღვევს მოქალაქის თავისუფალი არჩევანის უფლებას, ამიტომ, მოვითხოვ მის გაუქმებას."
