-
2016-01-21 08:44
საინიციატივო ჯგუფმა – „დაიცავი ძველი ბულვარი”- ფეისბუქაქცია #სამივე დაიწყო, იმის ნიშნად, რომ საზოგადოება ემხრობა ბათუმის ძველ ბულვარში სამივე ხეივანის შენარჩუნებას.
აქციაში მონაწილეობისთვის საჭიროა მონაწილემ გადაიღოს ფოტო, სადაც ჩანს სამი თითი (ბულვარის სამივე ხეივნის შენარჩუნების ასოციაცია), გამოაქვეყნოს და მოიწვიოს სამი მეგობარი.
შეგახსენებთ, თითქმის ერთი თვეა საზოგადოება აპროტესტებს ხელისუფლების მცდელობას – გააუქმონ ბათუმის ძველი ბულვარის ერთ-ერთი ხეივანი. ხელისუფლება ამ ხეივანში ქვაფენილის ნაცვლად კორდის დაგებას გეგმავს, სადაც მოგვიანებით კაფე-ბარები უნდა განთავსდეს.
საინიციატივო ჯგუფმა – „დაიცავი ძველი ბულვარი“ პეტიციაც გამოაქვეყნა. პეტიციაზე ხელმომწერები არ ეთანხმებიან ბათუმის ძველ ბულვარში ახალი კონცეფციით გათვალისწინებული ცვლილებების განხორციელებას.
აქციას ჟურნალისტებიც შეუერთდნენ. მათთან ერთად, მედიაჰოლდინგი "აფხაზეთის ხმა" უერთდება ბათუმის ძველი ბულვარის დაცვის მიზნით დაწყებულ აქციას.