"ქართული გაზეთის" წყაროს ცნობით, 22 დეკემბერს ცესკოში მთავარი პროკურატურიდან შევიდა წერილი ალეკო ელისაშვილის წინასაარჩევნო დოკუმენტაციის გამოთხოვნის მიზნით. რის დადგენას ცდილობს პროკურატურა, ან რატომ გაჩნდა ელისაშვილის საარჩევნო დოკუმენტაციაზე ინტერესი სწორედ ახლა - უცნობია.
ალეკო ელისაშვილი ამ ფაქტს არ ადასტურებს, მაგრამ ჩვენთან საუბარში მან დაადასტურა, რომ ასევე წერილობით უკვე მიმართა ცესკოს პროკურატურის კითხვებთან დაკავშირებით. მთავარი პროკურატურის საზოგადოებასთან და მას მედიასთან ურთიერთობის დეპარტამენტის უფროსი ნათია სულხანიშვილი ვითარებაში გარკვევას დაგვპირდა, მაგრამ ამის შემდეგ არც სატელეფონო ზარებს და არც წერილობით შეტყობინებებს არ პასუხობს.
ცესკოს საზოგადოებასთან ურთიერთობის დეპარტამენტის უფროსმა ქეთი დანგაძემ ჩვენთან საუბარში ასეთი კომენტარი გააკეთა: „ცესკოდან რამდენჯერმე გათხოვილ იქნა ინფორმაცია სხვადასხვა სისხლის სამართლის საქმეებთან დაკავშირებით. აღნიშნულ საქმეზე ცესკო არ ფლობს მეტ ინფორმაციას, ვერც გასცემს რაიმე სახის ინფორმაციას გამოძიების საქმის მასალებთან დაკავშირებით.
თუ გამოძიება და კონკრეტული საქმე ეხება რომელიმე პირს, მას აქვს უფლება საგამოძიებო ორგანოში საპროცესო კანონმდებლობით დადგენილი წესით გაეცნოს მის შესახებ არსებულ საქმის მასალებს.“ ამავე დროს, N3 საბურთალოს საოლქო საარჩევნო კომისიის ტავჯდომარე აკაკი ხუსკივაძე ადასტურებს, რომ ცესკოს მოთხოვნით მან ელისაშვილის საბუთები მართლაც გადააგზავნა ცენტრალურ ოფისში:
„მე დაზუსტებით არ ვიცი პროკურატურამ მოითხოვა თუ არა ელისაშვილის საბუთები. აღნიშნული ამბავი კულუარულად ვრცელდება. თუმცა დადასტურებულად შემიძლია ვთქვა, რომ ელისაშვილზე ცესკომ ინფორმაცია გამოითხოვა საბურთალოს ოლქიდან.
თუმცა რაში ჭირდებათ ელისაშვილის მაჟორიტარ კანდიდატად რეგისტრაციის განკარგულებები ჩემთვის არავის აუხსნია. განკარგულებები რეგისტრაციის შესახებ ისედაც შესაძლებელია, მოიძიონ თუმცა ამ ეტაპზე ამ დოკუმენტების გამოთხოვა ვის რაში დაჭირდა, ეჭვებს ბადებს“.
"ქართული გაზეთი"
