2015-11-09 19:05

"რუსთავი-2"-ის გენერალური დირექტორის პირველი მოადგილე ზაალ უდუმაშვილი და საინფორმაციო სამსახურის უფროსი გიორგი ლაფერაშვილი არ ადასტურებენ "რ2"-ის ბაზაზე ახალი ტელეკომპანიის შესაძლო გახსნაზე გავრცელებულ ინფორმაციას. უდუმაშვილი "ლიბერალთან" ამბობს, რომ ეს მხოლოდ იუმორის დონეზე განიხილებოდა.

„რუსთავი 2-ის" გენერალური დირექტორის მოადგილე ზაალ უდუმაშვილი ახალი არხის შექმნის შესახებ ინფორმაციას არ ადასტურებს და აცხადებს, რომ ეს იდეა მხოლოდ იუმორის დონეზე განიხილებოდა.

„როცა პრემიერმა გვირჩია, გახსენით „რუსთავი 5-ო", იუმორის დონეზე განიხილებოდა, ასე ვთქვათ. ახალი არხის გახსნა სერიოზულად არ განიხილება", - უთხრა უდუმაშვილმა „ლიბერალს".

დირექტორის მოადგილე ამ საკითხს ვერც გია ყარამანიშვილის მიერ „პოსკრიპტუმში" გაკეთებულ განაცხადებასთან აკავშირებს, რომ ძმები ყარამანიშვილები მიხეილ სააკაშვილის ოპოზიციაში გადასვლის შემდგომ „რუსთავი 2-ის" გაყიდვასა და ახალი ტელევიზიის შექმნას გეგმავდნენ. 

ახალი ტელეარხის შექმნის შესახებ ინფორმაცია „ლიბერალს" არც არხის საინფორმაციო სამსახურის უფროსმა გიორგი ლაფერაშვილმა დაუდასტურა:

„ჩვენ ვმუშაობთ „რუსთავი 2-ში" და ვაპირებთ, რომ ვიმუშაოთ „რუსთავი 2-ში".  ვგულისხმობ იმ ადამიანებს,  იმ კოლექტივს, ვისთან ერთადაც ვარ. დანარჩენზე ვერაფერს გეტყვით", - ამბობს ლაფერაშვილი. 

"ლიბერალი"