2015-07-02 12:44

დღეს თბილისში, გალაკტიონის ხიდთან მომხდარ ფაქტზე, სადაც პრეზიდენტი მარგველაშვილი ფიგურირებს, სოციალურ ქსელში წერენ. ორი ინტერნეტმომხმარებელი მომხდარს ერთმანეთისგან დამოუკიდებლად აღწერს, ერთერთი კი ადგილზე გადაღებულ ფოტოსაც აქვეყნებს.

უჩა ხვედელიძე "ფეისბუქზე" წერს:

„დილით სამსახურში რომ მივდიოდი სასიამოვნო ფაქტს შევესწარი. შეიძლება ითქვას ქართველი პოლიტიკოსებისთვის არადამახასიათებელს და ამიტომ ქართველი ხალხისთვისაც მოულოდნელს და გასაკვირვს. მოკლედ, ტაბიძის ხიდზე გადავდიოდი და მეორე მხარეს დავინახე, რომ საკმაოდ მოხუც ქალბატონს ფეხი დაუცდა და წაიქცა, ამ დროს მასთან ახლოს არავინ იყო, მეც შორს ვიყავი და იმ წამსვე წავედი მისკენ, სანამ ტაბიძის ხიდზე გადავიდოდი, მოულოდნელად მოხუცის წინ გაჩერდა სწრაფად მომავალი ორი ტოიოტას ჯიპი და ამ სიტყვის პირდაპირი მნიშვნელობით, გადმოხტა პრეზიდენტი გიორგი მარგველაშვილი, წამოაყენა ქალბატონი, დაელაპარაკა, შემდეგ ტაქსიში ჩასვა, ფული გადაუხადა და ძალიან სწრაფად დაბრუნდა მანქანაში. მე არა თუ ხიდზე გადასვლა, აზრზე მოსვლაც კი ვერ მოვასწარი :))))“.

ამავე ამბავთან დაკავშირებით ანუკი ლომიძე "ფეისბუქზე" ფოტოს აქვეყნებს მინაწერით: „უფრო ადრე ვერ მოვასწარი გადაღება, ისე უცებ მოხდა. უკან რომ დგას იმ ტაქსიში ზის უკვე ბებო და წინ მარგველაშვილი ჯდება მანქანაში“.