არასამთავრობო ორგანიზაცია „ევროპა ჩვენი სახლია“ ქუთაისის ხელმძღვანელობას ინიციატივით მიმართავს. ორგანიზაციის წინადადება ქალაქში კომუნისტურ-ტოტალიტარული იდეოლოგიის გამომხატველი სიმბოლიკების აღმოფხვრას გულისხმობს.
კერძოდ, „ევროპა ჩვენი სახლია“ ქუთაისში არსებული ვასილ კიკვიძის ძეგლის დემონტაჟს ითხოვს. კიკვიძე უკრაინის დამოუკიდებლობის წინააღმდეგ მებრძოლი და წითელი არმიის სარდალი იყო. მისი ძეგლი ქუთაისში უკვე 50 წელზე მეტია დგას. ორგანიზაციის წევრები ქალაქის მერიას სთავაზობენ, კიკვიძის სკვერს უკრაინის სახელი ეწოდოს.
„ქუთაისის ბიუჯეტში ყოველწლიურად არის გათვალიწინებული მსგავსი ხარჯი, რომელიც უსახური შენობების დემონტაჟს ითვალისწინებს.10 წუთია საჭირო ამ ძეგლის ჩამოსაღებად. ახლა კანონი გვავალდებულებს ამ ძეგლის ჩამოღებას. ქუთაისთან დაძმობილებულია უკრაინის ქალაქი ჟიტომირი. ამ ქალაქის დელეგაცია რომ ჩამოდის ქუთაისში, რას ვეუბნებით, როდესაც მათი ქვეყნის დამოუკიდებლობის წინააღმდეგ მებრძოლის ძეგლი დგას ქუთაისში,“ - ამბობს ორგანიზაციის წევრი თორნიკე ბარათაშვილი.
„ევროპა ჩვენი სახლია“ ქუთაისის მერიას ქალაქში არსებული რუსული და საბჭოთა სახელწოდების ქუჩებისათვის სახელების გადარქმევისკენაც მოუწოდებს. მაგალითად, ორგანიზაცია ითხოვს, რომ მოსკოვის ქუჩას კახა ბენდუქიძის სახელი ეწოდოს. ვოლგოგრადის ქუჩა ქაიხოსრო ჩოლოყაშვილის ქუჩის სახელწოდებით შეიცვალოს, ვასილ კიკვიძის ქუჩას ახალმოწამეების სახელი ეწოდოს, ხოლო ბესარიონ ბელინსკის ქუჩის სახელწოდება რობერტ შუმანის სახელით შეიცვალოს.
„ევროპა ჩვენი სახლია“-ს აღნიშნულ ინიციატივასთან დაკავშირებით ქუთაისის მერიაში კომენტარს არ აკეთებენ.
შეგახსენებთ, რომ კიკვიძის ძეგლი ქუთაისში არაერთხელ შეღებეს წითლად, ხოლო ბოლო ასეთი აქტის დროს მის კვარცხლბეკზე, ასევე წითელი საღებავით, "ჩამომიღეთ" დააწერეს.
news.ge
