2014-05-06 11:29

"რუსთავი2"-ის საგანგებო განცხადების თანახმად, ხდება სამაუწყებლო კომპანიის დირექტორისა და საინფორნმაციო სამსახურის უფროსის აუდიო-ვიზუალური თვალთვალი და ჩაწერა. გენერალური დირექტორის, ნიკა გვარამიას განცხადებით, აქვთ ინფორმაცია, რომ არსებობს რამდენიმე, მათ შორის, პირადი ხასიათის ფაილიც.

"მოგვაწოდეს ინფორმაცია, როგორ მიდის ჩემი და საინფორმაციო სამსახურის უფროსის, ნინო შუბლაძის აუდიო-ვიზუალური ჩაწერა. წარმოდგენილი მასალა მოიცავს 2 ფაილს. ჩემ შემთხვევაში ჩანაწერის ქრონომეტრაჟი არის 15 წუთი, ნინო შუბლაძეზე- 1 საათი. მედიას მივცემთ ამონაკრებს თითო წუთიანს. დანარჩენზე არის პირადი ხასიათის დეტალები, რომლის გამხელისგან თავს შევიკავებთ", - აღნიშნა ნიკა გვარამიამ. 

"ჩვენი ძალებით ვეცადეთ სათვალთვალო ტექნიკის აღმოჩენა, მაგრამ ვერ შევძელით. აღმოვაჩინეთ სპეციფიური ნახვრეტები, თუმცა ვიდეოკამერები არ დაგხვდა", - განაცხადა "რუსთავი-2"-ის დირექტორმა, პასუხისმგებლობა ხელისუფლებას დააკისრა და მოუწოდა, შეწყდეს თვალთვალი და მიყურადება:

„მოვუწოდებ საქართველოს ხელისუფლებას:

1.შეწყდეს ჩვენი მედიის უკანონო თვალთვალი და ფარული მიყურადება.

2. დაუყოვნებლივ დაიწყოს გამოძიება და უმკაცრესად დაისაჯონ უშუალოდ ის დამნაშავეები და ასევე ყველა ის თანამდებობის პირი, რომელსაც მიღებული აქვს უკანონო გადაწყვეტილება ან გაცემული აქვს უკანონო დავალება, ან რომლისთვისაც ცნობილი იყო უკანონო ქმედებების განხორცილების თაობაზე და არ მიიღო აუცილებელი ზომები მათ აღმოსაფხვრელად.

3. მომავალში ნებისმიერი სახისა და შინაარსის უკანონოდ მოპოვებული აუდიო თუ ვიდეომასალის ნებისმიერი გზით გავრცელებაზე და საინფორმაციო სივრცეში მათ განთავსებაზე, სრული პასუხისმგებლობა საქართველოს ხელისუფლებას ეკისრება“.