2014-05-05 23:39

დემოკრატიული განვიტარების ეროვნული ცენტრი საქართველოს პრემიერმინისტრს ირაკლი ღარიბაშვილს მიმართავს და თანამდებობიდან შს მინისტრის გადაყენებას სთხოვს.

„აფხაზეთის ხმა“ აქვეყნებს დემოკრატიული განვითარების ეროვნული ცენტრის განცხადებას:

„ბატონო პრემიერო, მოგმართავთ თხოვნით გაიზიაროთ ჩვენი მოსახლეობის შეშფოთება. ჩვენი მოქალაქეები მშვიდად ვეღარ გადაადგილდებიან, მათთვის არ არსებობს არანაირი უსაფრთხო გარემო და მშვიდი ცხოვრების გარანტიები. პოლიცია ვეღარ ახერხებს მათ დაცვას და ჩვენს მოქალაქეებს ადგებათ ზიანი. დანაშაულმა საგრძნობლად იმატა და ქუჩაში ნიღბიანი ბანდფორმირებები ადამიანებს სასტიკად უსწორდებიან, ეს არაა ის სტანდარტი, რომელსაც ჩვენი ხალხი იცნობს.

გარდა ბანკების და ავტოგასამართი სადგურების დაყაჩაღებისა, საგრძნობლად მომრავლდა გაუპატიურების, ქურდობის, ძალადობის და შურისძიების მიზნით ადამიანის მკვლელობის, მკვლელობის მცდელობის და დაჭრის ფაქტები. დედაქალაქის ქუჩებში ადამიანებს ელექტრო შოკით შეიარაღებული ჯგუფები თავს ესხმიან. ჩვენი მოქალაქეები დაუცველები გახდნენ და შინაგან საქმეთა სამინისტრო დაკისრებულ პასუხისმგებლობას თავს ვერ ართმევს, ბატონი ალექსანდრე ჭიკაიძე მათ უსაფრთხოებას ვერ უზრუნველყოფს.

მოგმართავთ თხოვნით გაიზიაროთ ჩვენი ხალხის გულის წუხილი და მოახდინოთ ამაზე მკვეთრი რეაგირება. საზოგადოების იუსაფრთხოების ინტერესებიდან გამომდინარე გთხოვთ დააყენოთ საქართველოს შინაგან საქმეთა მინისტრის ბატონი ალექსანდრე ჭიკაიძის თანამდებობიდან გადაყენების საკითხი, ვინაიდან მისი უუნარობა თუ პირადი ინტერესები პირდაპირ აზარალებს მოსახლეობის სიმშვიდეს და უსაფრთხოებას, ამ დროს კი მინისტრმა თანამდებობა უნდა დატოვოს.

იმ შემთხვევაში, თუ არ იქნება გათვალისწინებული ჩვენი საზოგადოების თხოვნა და ინტერესები, თქვენ თავად მოგიწევთ ყოველივეზე პასუხისმგებლობის აღება“,- აღნიშნულია განცხადებაში.