2014-05-05 11:15

მარტვილის მუნიციპალიტეტის სოფელ ინჩხურის მოსახლეობა ტაძრის წინამძღვრის მამა გრიგოლის დაბრუნას ითხოვს. 

სწორედ ამის გამო ამბროსი ხელაიას სახელობის ტაძრის მრევლი ეპარქიას დაუპირისპირდა.

როგორც „აფხაზეთის ხმას“ ადგილობრივებმა განუცხადეს, მამა გრიგოლს ძალიან კარგი დამოკიდებულება ჰქონდა მრევლთან, შემდეგ კი მოულოდნელად წავიდა, ყოველგვარი ახსნა-განმარტების გარეშე.

„როგორც ჩვენთვისაა ცნობილი, მან პატრიარქს მიმართა, რომ სხვაგან გადაეყვანა. მიზეზებზე არ უსაუბრია და არც წინასწარ გვცოდნია რაიმე, ისე წავიდა. როგორც ამბობენ, მას ეპარქიის ხელმძღვანელთან ჰქონდა კონფლიქტი და სწორედ ამიტომ მოისურვა გადასვლა.

ახლა კი მრევლი ითხოვს მის დაბრუნებას. თუმცა, ეს არ ნიშნავს, რომ ახლანდელი მოძღვრის წინააღმდეგნი არიან. როგორც ჩემთვისაა ცნობილი, მამა გრიგოლის მრევლი რეალურ განმარტებებს ითხოვს, თუ რატომ დატოვა წინამძღვარმა ტაძარი“.

ამბროსი ხელაიას სახელობის ტაძრის მრევლი,  პროტესტის ნიშნად, ახალ მოძღვართან ტაძარში ღვთისმსახურებაზე არ დადის.

მომხდართან დაკავშირებით სპეციალური განცხადება ეპარქიის სახელით მამა ანდრია სალაიამ გააკეთა და აღნიშნა, რომ მამა გრიგოლსა და ეპარქიას შორის არანაირი დაპირისპირება არ არსებობდა და მოძღვარი ყაზბეგში საკუთარი ნებით წავიდა.

“მეუფემ მამა გრიგოლს სთხოვა, დაბრუნებულიყო და მრევლისთვის ყველაფერი აეხსნა, თუმცა მან ეს უგულებელჰყო. საპატრიარქოშიც დაიბარეს, თუმცა არც მათ დაუჯერა და ყაზბეგში თავის მოძღვართან დარჩა. ის ადამიანები კი, ვინც დღეს იქ იყვნენ შეკრებილები, რთულია, მრევლად აღვიქვა. მათ სხვას ვერაფერს ვუწოდებ გარდა პროვოკატორებისა”, - განაცხადა მამა ანდრია სალაიამ.

ცნობისთვის, მარტვილის მუნიციპალიტეტში პირველი შემთხვევა არაა, როცა მრევლი მათი მოძღვრებისა და ეპარქიის ხელმძღვანელს შორის დაპირიპირებაზე საუბრობს. ამის რამდენიმე მაგალითიც ყოფილა თუნდაც წინასაარჩევნოდ, როცა სასულიერო პირებს შორის განხეთქილება მათმა პოლიტიკურმა შეხედულებებმა გამოიწვია. თუმცა, მხარეები ამაზე ხმამაღალ საუბარს ერიდებიან. 

"დროანიუსის" ფოტო