2014-08-02 23:18

ექსპრეზიდენტ მიხეილ სააკაშვილის მტკიცებით, ბადრი პატარკაციშვილი და ბიძინა ივანიშვილი მტრები იყვნენ.

მისი თქმით, ბიძინა ივანიშვილთან ურთიერთობა ჰქონდა მასაც და  ვანო მერაბიშვილსაც.

„ჩვენი ურთიერთობა იყო ძალიან კონკრეტული. ივანიშვილს  ვთხოვდით პროექტების გაკეთებას და აკეთებდა იმიტომ, რომ ჩვენ ვთხოვდით და არა იმიტომ, რომ ასე უნდოდა.

მერე ეტყობა მობეზრდა. რამდენჯერმე  სცადა ჩვენთვის შემოეთავაზებინა პირდაპირ ფული, ისევე როგორც შევარდნაძის ოჯახს აძლევდა, რაზედაც  მიიღო კატეგორიული უარი და იძულებული იყო, დაეფინანსებინა განათლებაში რაღაც პროექტები, ინფრასტრუქტურაში.

აფინანსებდა ჩვენი კეთილგანწყობის მოსაპოვებლად ალბათ, ასე არიან მიჩვეული ოლიგარქები - სადაც არიან, იქ უნდა ასიამოვნონ“, - განაცხადა სააკაშვილმა.

ჟურნალისტის კითხვაზე, თუ როგორი იყო ივანიშვილის რჩევა 7 ნოემბრის აქციასთან დაკავშირებით, ექსპრეზიდენტმა უპასუხა, რომ ივანიშვილი იყო უკიდურესად გადამწყვეტი მოქმედებების მომხრე.

,,უფრო მეტიც, ვანოს ურჩევდა ყველანაირ ხრიკებს პატარკაციშვილის წინააღმდეგ, ისინი იყვნენ მტრები და ვანოსთვის ეს იყო საინტერესო, რადგან ერთმა რუსმა ოლიგარქმა უკეთ იცოდა მეორეს ჩვევები.

ისინი იყვნენ მტრები და ივანიშვილი მზად იყო, წასულიყო ბოლომდე“, - განაცხადა სააკაშვილმა.