2014-07-29 15:32

პარლამენტი განიხილავს კანონპროექტს „სამხედრო ვალდებულებისა და სამხედრო სამსახურის შესახებ", რომლის  თანახმადაც, პარლამენტის წევრს სამხედრო სამსახურში არ გაიწვევენ.

ამჟამად მოქმედი კანონის თანახმად, სამხედრო სამსახურში გაწვევისაგან თავისუფლდება: ჯანმრთელობის მდგომარეობის გამო სამხედრო სამსახურისათვის უვარგისად ცნობილი პირი;

პირი, რომელმაც სამხედრო სამსახური სხვა სახელმწიფოს სამხედრო ძალებში გაიარა;

პირი, რომელიც სისხლის სამართლის მძიმე ან განსაკუთრებით მძიმე დანაშაულის ჩადენისათვის არის ნასამართლევი;

პირი, რომელიც გადის არასამხედრო, ალტერნატიულ, შრომით სამსახურს; პირი, რომელსაც მინიჭებული აქვს სამეცნიერო ხარისხი და ეწევა პედაგოგიურ ან სამეცნიერო მუშაობას;

ერთადერთი ვაჟი ოჯახში, რომლის ერთი წევრი მაინც დაიღუპა საქართველოს ტერიტორიული მთლიანობისათვის ბრძოლებში ან სამხედრო სამსახურის გავლისას.

ასევე, პრემიერ-მინისტრი უფლებამოსილია სამხედრო ვალდებულების მოხდისაგან გაათავისუფლოს განსაკუთრებული ნიჭით დაჯილდოებული წვევამდელი.

ახალ კანონპროექტში აღნიშნულ ჩამონათვალში ვერ მოხვდნენ პირები, რომლებიც პედაგოგიურ ან სამეცნიერო მუშაობას ეწევიან. ისინი სამხედრო სამსახურში გაწვევას დაექვემდებარებიან.