უზენაესი სასამართლოს თავმჯდომარის განცხადებით, ბევრი ასეთი ავყია ადამიანი დადის სასამართლოში და განცხადებებს აკეთებს.
ეს მოსამართლეებისთვის უცხო არ არის და ისინი უმკლავდებიან ასეთი რიგითი მოქალაქეების, თუ სხვა მხარეთა წარმომადგენლების მხრიდან ასეთ შეფასებებს.
„მათ აქვთ უფლებამოსილება, თუ ადამიანი დარბაზიდან ადგება და რაღაცას იტყვის, მაშინვე დააჯარიმონ, ან გააძევონ დარბაზიდან, ამიტომ ეს ფაქტი თავისთავად არავითარ საფრთხეს არ ქმნის, ამ დროს კი არ სჭირდებათ მოსამართლეებს დაცვა, როცა თვითონ აქვთ შესაძლებლობა, არამედ მაშინ, როცა ხელისუფლების უმაღლესი წარმომადგენლების მხრიდან მოსამართლეთა მიმართ თავდასხმები ხდება.
მეც ძალიან გაოცებული ვარ ირაკლი ღარიბაშვილის პასიურობით მაშინ, როდესაც მისი მთავრობის წარმომადგენელი, მინისტრი გამოდის და მოსამართლეებზე ტელევიზიის პირდაპირი ეთერით პირდაპირ ზეგავლენას ახორციელებს. ძალიან გაოცებული ვარ, რატომ არ გამოდის ის, რატომ პასიურობს და არ ამბობს, რომ ეს არის პირდაპირი გავლენის მცდელობა მოსამართლეებზე.
პირდაპირ ეთერში მოსამართლეების სახელებსა და გვარებს ასახელებენ და ამბობენ, რომ ესენი არ მოგვწონს და ესენი არ უნდა იყვნენ მოსამართლეები. ეს მინისტრი ამბობს, რომ კონიუნქტურულ გადაწყვეტილებებს იღებენ მოსამართლეები.
ჩემი აზრით, აი, მაშინ უნდა გამოვიდეს პრემიერ-მინისტრი, არ უნდა იყოს პასიური და უნდა თქვას, რომ ხელისუფლების წარმომადგენლების მხრიდან ასეთი კომენტარები არის პირდაპირ ზეგავლენის მცდელობა მოსამართლეთა წინააღმდეგ”, - განაცხადა კუბლაშვილმა
შეგახსენებთ, რომ პრემიერ-მინისტრი ირაკლი ღარიბაშვილი უკრაინის შს ყოფილი მინისტრის, იური ლუცენკოს მიერ ვანო მერაბიშვილის სასამართლო პროცესზე გაკეთებულ განცხადებას გამოეხმაურა. იური ლუცენკომ აღნიშნა, რომ მოსამართლეს უფრო ეშინოდა მერაბიშვილის, ვიდრე მერაბიშვილს - მისი.
ირაკლი ღარიბაშვილის თქმით, კონსტანტინე კუბლაშვილს უნდა დაეცვა მოსამართლის ღირსება და ძალიან საეჭვოა, რატომ არ გააკეთა არანაირი რეაგირება.