2014-07-24 10:28

პარლამენტის სხდომაზე უმრავლესობის ლიდერი დავით საგანელიძე და უმცირესობის დეპუტატი გიგი წერეთელი ერთმანეთს სიტყვიერად დაუპირისპირდნენ.

დავით საგანელიძემ უმცირესობის წევრებს ის პერიოდი შეახსენა, როცა „ნაციონალური მოძრაობის" პოლიტიკის გამო საქართველოს ტერიტორიების ნაწილი დაიკარგა.

„სად წაიღეთ ის მიწები თქვენი აგრესიის გამო, თქვენი იმ ენის გამო, რომელსაც არ იოკებდით პირის ღრუში. თქვენი ყოყლოჩინობის გამო, როდესაც ვიღაც ლენჩი აგინებდა პუტინს, რა მიიღეთ?! სად ხართ ეს ვაჟკაცები ახლა?!

რუსეთს იმ ენით ვესაუბრებით, რომ იქნებ ჩვენი ნაწარმი რუსეთის ბაზარზე შევიტანოთ, იქნებ ეკონომიკა განვავითაროთ, იქნება ის დღეები არ გადაგვხდეს თავს, რაც თქვენს ხელში გადახდა საქართველოს. დიპლომატიაა აქ საჭირო და არა ის ვაი ვაჟკაცობა", - მიმართა საგანელიძემ „ნაციონალური მოძრაობის“ დეპუტატებს.

დავით საგანელიძის ამ განცხადებას გიგი წერეთლის უკმაყოფილება მოჰყვა.  ,,წესიერად გამოდი და ისაუბრე",- მიუთითა წერეთელმა საგანელიძეს, რაზეც საგანელიძე აფეთქდა: „ამ ქვეყანაზე ზემოდან რაც ისეირნე, ისიც გეყოფა. არც ერთ რეგლამენტში არ არის ის, რომ შენ ჭკუა ასწავლო ვინმეს.“