შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილი აცხადებს, რომ მიხეილ სააკაშვილი მის გვარს პრორუსულად განწყობილთა შორის იმიტომ ასახელებს, რომ მას ამხელდა.
ამის შესახებ ზაქარეიშვილმა „რეაქციაში“ განაცხადა, როცა გადაცემის წამყვანმა საქართველოს მესამე პრეზიდენტის მიერ მასზე, ალასანიასა და ვოლსკიზე გამოთქმული მოსაზრებების კომენტირება სთხოვა;
„თუკი ამქვეყანაში მხოლოდ მე, ალასანია და ვოლსკი ვართ პრორუსულები, ეს მხოლოდ მიხარია“, - განაცხადა პაატა ზაქარეიშვილმა, შემდეგ კი დაამატა:
„მე ხომ ვიცი, ვინ ვარ და რამდენი რამე გამიკეთებია. მე ვარ ერთადერთი, რომელიც 2006 წლიდან იმეორებდა, რომ სააკაშვილი თამაშობდა რუსულ თამაშს, რომ ის მოქმედებდა კრემლის სცენარით, ამბობდა, რომ თითქოს პუტინი იყო კეთილი, რომ მას თვალებში ჩახედა და რომ თითქოს პუტინს არ აინტერესებს ცხინვალი...
აი, ამიტომ ვყავარ ყელში გაჩხერილი სააკაშვილს, ამიტომ მიწოდებს მე პრორუსს, რადგან მე ვიყავი ერთადერთი და კიდევ რამდენიმე ადამიანი, რომელიც მას უწოდებდა პრორუსს. მან ჩააბარა ქართული მიწები რუსეთს, ჩვენი მიზანი კი არის მაქსიმალურად მოზომილი ურთიერთობა რუსეთთან და თანდათანობითი დისტანცირება რუსული ორბიტიდან“, - განაცხადა სახელმწიფო მინისტრმა.
პაატა ზაქარეიშვილი პროკურატურის მიერ დაკითხვაზე მიხეილ სააკაშვილის დაბარებასაც შეეხო და განაცხადა, რომ მის დაპატიმრებას არავინ გეგმავდა, კითხვებზე პასუხები კი უნდა გაცემულიყო:
„რაც შეეხება სააკაშვილის დაპატიმრებას, არავინ უპირებდა მას დაპატიმრებას, მან თავისი თავი თვითონ დააპატიმრა, მან თავის თავს თვითონ გამოუტანა განაჩენი, როცა მოკურცხლა საქართველოდან“.
პაატა ზაქარეიშვილმა იმის გამოც გამოთქვა წუხილი, რომ ჟურნალისტები „ნაციონალური მოძრაობის“ წევრების განცხადებებს დიდ ყურადღებას უთმობენ:
„დღეს ჩვენი საზოგადოების უბედურება სწორედ ის არის, რომ ჟურნალისტები თავიანთ სამუშაო გრაფიკს „ნაციონალური მოძრაობის“ ყოველგვარ ლოგიკას მოკლებულ ბოდვებზე აგებენ“, - აღნიშნა პაატა ზაქარეიშვილმა „რეაქციაში“.
