2015-04-29 11:01

აზერბაიჯანმა არ უპასუხა საქართველოს პროკურატურის თხოვნას, დაეპატიმრებინათ საქართველოს მესამე პრეზიდენტი. მიხეილ სააკაშვილი ბაქოში იმყოფება.

საქართველოს პროკურატურაში ადასტურებენ, რომ ოფიციალურ ბაქოს სააკაშვილის დაპატიმრების მოთხოვნით მიმართეს, თუმცა, პასუხი არ მიუღიათ. პროკურატურისა და ზოგადად, ხელისუფლების მიდგომას სასაცილოსა და სამარცხვინოს უწოდებს საპარლამენტო უმცირესობა.

დაპატიმრების მოთხოვნას გამოეხმაურა თავად მიხეილ სააკაშვილიც: „მიუხედავად იმ წინააღმდეგობისა, რომელსაც მიქმნიდა საქართველოს ხელისუფლება, რათა აღეკვეთათ ჩემი ბაქოში ვიზიტი, მე მაინც აქ ვარ, ჩემს მეგობრებთან, - ამის შესახებ ექსპრეზიდენტმა მიხეილ სააკაშვილმა ადგილობრივ გამოცემა "ჰაქქინ.აზ"-თან ინტერვიუში განაცხადა.

სააკაშვილი აზერბაიჯანის დედაქალაქში ექს-პრეზიდენტებისა და მთავრობის მეთაურთა სამიტზე დასასწრებად ჩავიდა. მისი თქმით, ბაქოში უკრაინის ოფიციალური პირის სტატუსითაც იმყოფება.

"ყოველგვარი საუბარი იმის შესახებ, რომ ინტერპოლი მეძებს, სხვა არაფერია, თუ არა პროფანაცია", - აღნიშნა მიხეილ სააკაშვილმა.