2015-01-30 01:25

საქართველოს საგარეო საქმეთა ყოფილი მინისტრი მაია ფანჯიკიძე "პირველი რადიოს" პრესკლუბში ამბობს, რომ წინასწარ დაანონსებული საქართველოს პრემიერის ვიზიტი უკრაინაში ჩაშლილია. სავარაუდოდ, ეს იმ უტაქტო საუბარმა გამოიწვია, რომელიც ღარიბაშვილსა და უკრაინის ხელისუფლების ვერტიკალის წარმომადგენლებს შორის შედგა.

"ჩვენ დეკემბრის დასაწყისში მოვისმინეთ, რომ თითქოს პრემიერ-მინისტრის ვიზიტი იგეგმებოდა იანვარში. შემდეგ მოვისმინეთ, რომ პრემიერ-მინისტრის ვიზიტამდე შედეგბოდა მინისტრების ვიზიტები და ეს ვიზიტები მოამზადებდა პრემიერ-მინისტრის ვიზიტს.

ჩვენ ეხლა ვართ მოწმე იმისა, რომ არანაირი ვიზიტი დაგეგმილი არ არის. მე ვფიქრობ, რომ ეს არის სერიოზული ჩავარდნა, ჩვენ სერიოზულად გავაუარესეთ ურთიერთობები ჩვენს მეგობარ სტრატეგიულ პარტნიორ უკრაინასთან, ამას სჭირდება გამოსწორება და მე არ ვიცი რა კომუნიკაცია შედგა პრემიერს, და უკრაინის პრემიერსა და პრეზიდენტს შორის, იგი ამის თაობაზე საუბრობდა, იგი ამბობდა, რომ მან ორივეს უთხრა, რომ ყოფილი მაღალჩინოსნები ქართველები არიან დამნაშავეები და მათი დანიშვნა არ შეიძლებოდა.

მე ვფიქრობ, რომ ეს იყო აბსოლუტურად უტაქტო საუბარი, თუკი იგი ასეთი სახით შედგა და ამან არ იმოქმედა დადებითად ორ ქვეყანას შორის არსებულ ვითარებაზე. ის, რომ იუსტიციის მინისტრი ვერ პოულობს დროს ქართველ კოლეგასთან შესახვედრად, არის ძალიან ბევრი რამის მანიშნებელი. იმისი, რომ სურვილი, ინტენსიური ურთიერთობისა უკრაინას საქართველოსთან სამწუხაროდ არა აქვს.

ამ საკითხს სჭირდება სასწრაფო გამოსწორება და ყველა ბერკეტი უნდა იყოს გამოყენებული იმისათვის, რომ უკრაინელი კოლეგები არ ექცეოდნენ ქართველ კოლეგებს ესე და შედგეს კომუნიკაცია მათ შორის", - ამბობს მაია ფანჯიკიძე "პირველი რადიოს" პრესკლუბში.