-
2014-11-20 15:55
,,კატეგორიულად წინააღმდეგი ვარ, რომ ვინმემ, ერთმა ადამიანმა საკუთარი თავი გააიგივოს ევროპულ არჩევანთან,“ – ამის შესახებ საქართველოს იუსტიციის მინისტრმა რადიო ,,თავისუფლების” პრაღის ბიუროსთან ინტერვიუში განაცხადა.
თეა წულუკიანის ეს კომენტარი ,,თავისუფალი დემოკრატების” იმ განცხადებას ეხებოდა, რომლის მიხედვითაც ქვეყნის ევროპული კურსი საფრთხეშია.
“ჩემი პოზიცია იყო და არის ის, რომ ხელისუფლება, რომელიც 2012 წლის პირველ ოქტომბერს ქვეყნის სათავეში მოვიდა, პროდასავლური მთავრობაა, რომელიც 24 საათის განმავლობაში მუშაობდა თუნდაც იმისთვის, რომ ასოცირების შეთანხმებას ხელი მოწეროდა, რომ ის სხდომა შემდგარიყო, რომელიც 17 ნოემბერს ბრიუსელში შედგა, რომ ის მაღალი ვიზიტები და შეფასებები მიგვეღო, რაც ორი დღის წინ მივიღეთ ბრიუსელში.
თუმცა ის მაღალი შეფასებები, რომელსაც იღებს მთავრობა ევროკავშირისა თუ ნატოს მხრიდან, არ ეკუთვნის ამ მთავრობას, ეს ეკუთვნის ხალხს და სწორედ აქ განსხვავდება ჩემი და ,,თავისუფალი დემოკრატების” პოზიციები ერთმანეთისგან, დღეს უკვე ძალიან რადიკალურად.
მე კატეგორიულად წინააღმდეგი ვარ, რომ ვინმემ, ერთმა ადამიანმა საკუთარი თავი გააიგივოს ევროპულ არჩევანთან, რომ მე თუ ვარ, ესე იგი პროცესი ევროპულია და თუ არ ვარ, ე.ი არ არის.
ამ განცხადებას ჰგავდა ის განცხადება, რომელიც ჩემთვის აბსოლუტურად სიურპრიზის სახით წამოვიდა ტელევიზორიდან და ეკრანიდან მეცა სახეში”, – განაცხადა წულუკიანმა.