-
2014-04-30 11:37
თბილისში, ვარკეთილის ე.წ. დამპალოს სასაფლაოზე 16 საფლავი დარბეულია, ამის შესახებ ინფორმაციას „მედიანიუსი“ ავრცელებს. გამოცემის ინფორმაციით, დარბევა, სავარაუდოდ, 23 აპრილს მოხდა.
როგორც ,,მედიანიუსს” სასაფლაოს ადმინისტრაციაში განუცხადეს, დარბეული 16 საფლავიდან 13 ქართულ-სომხურია, სამი კი ებრაული.
სასაფლაოს ადმინისტრაციაში აცხადებენ, რომ საფლავების დარბევა 23 აპრილს სავარაუდოდ, ღამით მოხდა.
,,სასაფლაოს დაცვა არ ჰყავს. ჩვენ დილიდან საღამოს 17:00 საათამდე ვმუშაობთ. 24-ში, რომ მოვედით, სასაფლაოს შემოვლისას აღმოვაჩინეთ, რომ საფლავები დარბეული იყო. ამის შემდეგ სამართალდამცავებს ვაცნობეთ. ისინი ადგილზე მოსულებიც იყვნენ და ფოტოებიც გადაუღეს დარბეულ საფლავებს. დარბეულია სამი ებრაული და 13 მართმადიდებლური საფლავი,”- აცხადებენ ადმინისტრაციაში.
სასაფლაოს ადმინისტრაციაში აღნიშნავენ, მათ მხოლოდ რამდენიმე გარდაცვლილის ოჯახის წევრების კონტაქტი ჰქონდათ და მათაც მაშინვე აცნობეს მომხდარი ვანდალური ფაქტის შესახებ, თუმცა საკონტაქტო ინფორმაციის უქონლობის გამო, დარბეული 16 საფლავიდან უმეტესობის ოჯახის წევრებმა ამ დრომდე არ იციან მომხდარის შესახებ.
ადმინისტრაციამ მომხდარის შესახებ ინფორმაცია თბილისის მერიის შესაბამის სამსახურსაც მიაწოდეს, რადგან სასაფლაო მათ დაქვემდებარებაშია.
დარბეულ საფლავებს შორის აღმოჩნდა ქართველი ებრაელი, რეჟისორ იური წიწუაშვილის საფლავიც, რომელიც ე.წ. დამპალოს სასაფლაოს, ებრაულის საფლავების ნაწილში მდებარეობს.
საფლავს მთლიანად მოგლეჯილი აქვს მარმარილოს ქვა, რომელიც საფლავზეა დაგდებული და დამტვრეული. ანალოგიური მდგომარეობაა კიდევ ორ ებრაულ და 13 სხვა საფლავზე.
როგორც ,,მედიანიუსს” იური წიწუაშვილის ოჯახის წევრებმა განუცხადეს, მათ მომხდარის შესახებ სასაფლაოს ადმინისტრაციამ შეატყობინა.
აღსანიშნავია ის ფაქტი, რომ 16-ვე სასაფლაო მხოლოდ დარბეულია და არა გაქურდული, რადგან მარმარილოს მოგლეჯილი ფილები იქვე, სასაფლაოს გარშემო ყრია.
აღნიშნულ ფაქტთან დაკავშირებით ,,მედიანიუსი” შინაგან საქმეთა სამინისტროსაც დაუკავშირდა, სადაც ე.წ. დამპალოს სასაფლაოზე საფლავების დარბევის ფაქტი კატეგორიულად უარყვეს და განაცხადეს, რომ ამ ინფორმაციას არ ადასტურებენ.
"მედიანიუსის" ფოტოები