2014-04-30 04:21

30 აპრილს, 11:30 წუთზე თბილისში, ყოფილი პარლამენტის შენობისა და ქუთაისში, მოქმედი პარლამენტის შენობის წინ ანტიდისკრიმინაციული კანონის სავარაუდო მიღებასთან დაკავშირებით პარაკლისის გადახდაა დაგეგმილი.

ამის შესახებ სასულიერო პირები მთელი ღამის განმავლობაში მრევლს ტელეფონებზე გაგზავნილი მოკლე ტექსტური შეტყობინებითა და სოციალურ ქსელებში „ფეისბუქსა“ და „ოდნოკლასნიკებში“ გამოქვეყნებული სტატუსებით აფრთხილებდნენ.

სტატუსებში ცალკეულ მედიასაშუალებათა ჟურნალისტებიც იყვნენ მონიშნული. სასულიერო პირები ანტიდისკრიმინაციული კანონის მიღებას „მამათმავლობის დაკანონებად“ მიიჩენევენ და მოქალაქეებს მოუწოდებენ, აქცია-პარაკლისში მონაწილეობა აუცილებლად მიიღონ.

სასულიერო პირების სტატუსებს იზიარებდა მრევლი, ასევე ისინი ზიარდებოდა „ფეისბუქის“ იმ გვერდებზე, რომლებიც, აღწერის მიხედვით, მორწმუნე მართლმადიდებლებისთვისაა შექმნილი.

„აფხაზეთის ხმას“ თვითმხილველმა უთხრა, რომ საქართველოს საპატრიარქოს მიმდებარე ტერიტორიაზე და თავად საპატრიარქოს ეზოში გვიან ღამემდე არ შეწყვეტილა ავტომანქანებისა და სასულიერო პირების მოძრაობა და გადაადგილება - სავარაუდოდ, სწორედ საპატრიარქოში შეთანხმდა 30 აპრილის აქცია-პარაკლისის დეტალები.

შეგახსენებთ, რომ სასულიერო პირები და „მართლმადიდებელ მშობელთა კავშირი“, ასევე რამდენიმე დეპუტატი და მრევლის ნაწილი ანტიდისკრიმინაციული კანონის მიღებას ეწინააღმდეგება. დღეს პარლამენტის ადამიანის უფლებათა დაცვის კომიტეტის სხდომა, სადაც კანონპროექტი განიხილებოდა, სასულიერო პირებმა პროტესტის ნიშნად დატოვეს.